熱門:

2018年1月16日 即巿股評 港股直擊

【輪證贏家】請問仲升定會掉頭跌呀?

各位早晨呀!9點40分,能夠開到部電腦打稿嘅原因只有一個:係,我係屋企;能夠呢個鐘數都仲係屋企嘅原因有兩個:放假同Sick leave,放假嘅話我係會單聲嘅,但sick leave嚟講,真係無計,我開始懷疑我公司嗰層係咪變咗疫埠,事關上個星期病完之後噚日又嚟過,頂唔順五點就閃咗去睇醫生,最後被個醫生話:你發燒喎,點解好似無乜事咁嘅?唉,醫生,唔通你想我話你知:我根本都唔知自己發燒⋯

只知道嘅係噚日由下晝1點40分做咗全日高位31733點之後,個市就唔知被邊個傳染,同我一樣瞓底咁滯。拆開5分鐘圖睇,係下晝3點25分,恒指做咗全日底位31265點之後有跌定嘅跡象,事關有條750分鐘線(5 X 250線)支持住,不過,承如噚日隻稿所言,收市前吼個5分鐘圖見超賣位就入隻恒指牛(61566),到今朝我咬住老爺烚比我嘅蕃薯做早餐,睇電視見做緊啲財經節目講開市,恒指又裂口高開,開市報31423點;到依家9點51分,恒指進一步升至31528點,5分鐘圖見SlowSTC(14,3)都已經踩入嚴重超買範圍,(61566)可以率先收工。

呢期都收到唔少讀者話自已入咗Put/熊仔,又或者係問可唔可以入Put/熊仔,無論有無貨都好,大家嘅問題都應該得一個:個市跌未?呢個問題其實都纏繞咗我成個星期,其實上個星期我都試過入熊仔博跌架,當然呢個小注試水溫倒頭來被淥熟腳啦,因為恒指牛熊證街貨圖熊證仔嘅吸引度,都真係有方法令到技術分析變得超買再超買。

依家9點58分,恒指現價31551點,上方熊證最貼價嘅31700至31799點有相當於310張期指;重貨區就剛好係大位度,即係32000至32099點,呢度有相當於936張期指,睇嚟大家都覺得恒指有機會升穿31958之後就無去路。

睇埋下方嘅牛證,最近嘅係30800至30899點,呢度有相當於1076張期指,係就係肥,但同個市爭成751點喎,我用番呢751點向上行呀,即係31551+751=32302點,用恒指牛熊證街貨圖度上去嘅話,即係踩至32300至32399點,反過來計返下方所有熊證嘅話,即係total可以食到2934張期指,咁你話向邊邊行着數啲?恒指牛(62336),收回價31011點,同現價差400零點,開始有啲再貼價啲嘅牛證出現,就算個市爬得幾格,但都因為隻證貼價、高槓桿而有好收獲。

作者阿珊,從事財經及投資版報道超過10年,由平面媒體走到網絡世界。相信技術分析,由窩輪到牛熊證無一不炒,唔貪心,志在搵餐下午茶。

電郵:[email protected]

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads