熱門:

2018年1月15日 即巿股評 港股直擊

【輪證贏家】準備迎接恒指破頂

上個星期睇恒指波幅指數(VHSI)預計大市將會有一個比較大嘅波幅出現,配埋恒指「超買再超買」嘅走勢,第一擊先派隻熊仔出場,結果就當然係敗北啦;跟手唯有揀隻牛證出嚟,掉轉槍頭採順勢而行策略,上星期五(1月12日)恒指裂口高開,且再唔係十零廿點嘅走勢,講緊嘅係出現返三位數字嘅變幅,於是再嚟多次恒指牛,同樣地揀地遠價少少,甚至出動恒指Call嚟博再上;結果今日開市,恒指再次裂口高開升290點,開報31702點。依家10點1分,恒指最高做過31722點,曾升逾300點。VHSI果然無呃人。

開埋恒指牛熊證街貨圖睇。用恒指暫時做過最高嗰口價去計,即係話今朝個裂口恒指一口氣食咗三個範圍嘅熊證:31400至31499點;31500至31599點同埋31600至31699點,呢度夾埋有1394張期指,同時31700至31799點呢度由原本嘅第四貼價區,變成依家第一貼價區,而呢度有相當於764張期指,雖然係未過千,但已經係最重貨架啦。而萬眾期待嘅31958點,講緊嘅只係排係第三貼價區(31900至31999點),呢度暫時未見到重貨,只係得150張期指啫。

至於下方牛證,由於發行商出嘅牛證愈來愈貼價,變相依家最貼價嘅牛仔係30800至30899點,但其實都同現價有逾800點差距;重貨就係30500至30599點,呢度有相當於658張期指,雖然企埋啲就真係分多啲嘅,不過呢啲時勢就梗係要安全至上啦!(見圖)

依家10點13分,恒指升幅比今朝開市時細咗啲,所以依家日線圖上唔係出實色陽燭(即係高開低收嘅陽燭),就係變咁粒「十字星」。坦白講恒指連升N咁多日,連14RSI都搶到82,確係好吸引人買跌嘅;之但係轉角市真係唔係咁易捉,唔好話依家個樣呀,上星期恒指個樣唔似要回咩?(唔係博佢大跌,只係博佢回一回調),但結果都係要止蝕離開,可想而知依家大家個心係幾咁雄,幾咁想穿上31958點,再造另一個新嘅高位。

更重要嘅係,呢啲技術指標搶到顛,繼而手癢博掉頭,但恒指牛熊證街貨話你知個勢仲有得去嘅情況之下, 10次都真係有9次係恒指牛熊證街圖勝,唔講遠,講返上兩個星期心思思想博掉頭就知啦。恒指牛(61566),收回價30899點,雖然係一眾牛證之中最貼價嘅其中一隻,但同現價有逾700點距離,屬於安全之選得嚟呢度係同一收回價嘅牛仔中最高槓桿嘅一隻。觀乎呢幾日個市都係一開市就彈高,然後下行,再回返少少就橫行到收市,第二日又咁上下嚟講,臨收市吼5分鐘圖見超賣先好入場。

作者阿珊,從事財經及投資版報道超過10年,由平面媒體走到網絡世界。相信技術分析,由窩輪到牛熊證無一不炒,唔貪心,志在搵餐下午茶。

電郵:[email protected]

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads