噚日見住恒指倒跌，仲要跌得有60幾70點咁，以為下半場會一如所料開始見調整出現，誰不知下晝恒指又慢慢屈上去，到最後13連升；今朝換完衫又準備出門口時，電視報噚晚美股升200幾點，恒指熊(67659)都心知不妙。直到今朝早開市恒指升177點，開市報31298點就知瀨嘢，我仲同戰友Jack WhatsApp話：「點數真係多咗(因為噚日睇到VHSI跌到超賣水平)，但是上行呢！(又因為見恒指超買多時且噚日見恒指牛熊證街貨圖由近熊變遠熊)」。
依家10點10分，恒指報31287點，升166點，高位暫時做過31380點，以呢個點數套落去恒指牛熊證街貨圖上嘅話，換言之31100至31199點同埋31200至31299點所有熊證全數死亡，呢度夾埋有239張期指；同時31300至31399點就變成最貼價嘅熊證街貨，呢度有成818張期指，再上100點，即係31400至31499點呢度，就有成994張期指，好明顯呢兩個位係最重貨嘅熊證範圍，依家變到咁貼價，衰啲講句：唔死都無用(包括埋隻(67659))。
拆開恒指5分鐘街貨圖睇，今朝就更係裂口高開啦，係9點35分第一支燭就已經出現咗個暫時高位，跟手恒指升幅雖然有所收窄，不過到依家都未補返今朝個上升裂口；而從技術指標睇到今朝港股上行被搶到高位之後，港股升幅收窄將技術指標數值拉返落嚟，到依家10點24分，見技術指標回到落中軸水平之後就已急不及待咁再次向上行返，雖則係日線圖上暫時見到恒指呈「十字星」，but well，都唔重要啦，事關此前勁恒指多次超買但個升勢都仲死唔斷氣之下，都反映咗呢期順勢而行比逆市投資強。
明白你同我嘅憂慮係倒底依家個市係「高處未算高」定係「高處不勝寒」，若然想落場嘅話，策略上做一啲短trade比較安全，事關呢啲摸着石頭過河嘅日子，升市係令人興奮，但千祈不能被麻醉從而忘記「終有下行嘅一日」；揀輪證方面，明白到依家價外Call輪成兩毫子有啲貴同重，但佢好大嘅好處係萬一大市跣腳都唔會被人抵打靶；若然選擇牛證嘅話，就揀一啲遠價少少，同現價有至少600至700點以上，比多啲buffer位自己。
作者阿珊，從事財經及投資版報道超過10年，由平面媒體走到網絡世界。相信技術分析，由窩輪到牛熊證無一不炒，唔貪心，志在搵餐下午茶。
