|
熱門:

2017年12月7日 即巿股評 港股直擊

【盤房來料】唔重上50日線暫時死心

港股自30200點見頂,阿Man之前講咗,呢個係2017年頂部,短短兩個幾星期,已由該水平急挫二千點,仲要之前兩日急挫逾900點,畀個面都要反彈,但無諗過個市弱成咁,彈到28500之前已乏力,彈完又散過。

恒指今早裂口高開141點,一度升逾200點,高見28478半日高位,之後已乏力彈完又散,更曾倒跌28134點,逼近100日線(28121點),中午報收28226點,僅升1點,仲衰過無得彈。國指則再跌20點,報收11142點,又係畀阿爺拖死。

唔少人問阿爺幾時出嚟維穩,了解國情都知道,阿爺經過2015年溶斷一役,已出盡洪荒之力托市,結果慘敗。如今維穩係有秩序下跌,每天跌你多一些,同埋限制基金沽貨,咁內地基金無得沽,唔代表其他投資者唔可以走人,結果上證指數就失完3400,再失3300點。

騰訊(00700)今日暫停『企鵝屠牛記』,今日一度反彈至375.8元,即係阿Man預期反彈水平,半日僅升1.5%,報收371.6元。由高位439.6元跌咗幾70蚊,家吓先話彈幾蚊,確係杯水車薪。要怪就怪太多缸邊友買重騰訊牛,更有消息指內地有金融機構推出380元接貨價嘅I kill you later,接咗貨嘅投資者,為免損失更多,爭相出貨,再加埋大量牛仔觸及回收價,惡性循環之下,騰訊跌到走晒樣。雖然早兩日騰訊已劏咗唔少肥牛,但喺350-365元仍有另一個重貨區,再數落去要到330元樓下至鮮見牛踪,咁嘅情況下,騰訊有排都係有反彈,冇上升,炒波幅高難度,入貨長坐又未係時候,都係食吓花生算數。

連龍頭都反彈乏力,其他科技股亦咁上下,iPhone未有預期咁好賣,連阿Man呢個忠實果粉都冇興趣換iPhoneX,蘋果概念股死晒火,瑞聲(02018)叫做好啲仲有得彈1.2%;但插到咀歪嘅舜宇(02382)彈半成後,半日倒跌0.1%。次一線蘋概股,丘鈦(01478)挫4.9%;高偉(01415)跌0.8%,連跌第11日。其他科技股多數仆直,幾隻新經濟半新股再創上市新低。

汽車股跟內房股續跌,睇見唔開胃,試問咁多個之前強勢嘅板塊都彈唔起,港股可以彈得去邊,睇嚟都係彈散格局。不過暫時28200有啲支持,或者喺28200至28500之間吽吓先,但久守必失,大市未能短期重上50日線,即28700水平,暫時都係死咗條心。

麥狄文
(徐狄怡‧證監會持牌人)

 

回上

信報簡介 | 服務條款 | 私隱條款 | 免責聲明 | 廣告查詢 | 信報會議中心租賃 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。