|
熱門:

2017年12月7日 即巿股評 港股直擊

【輪證贏家】100天線暫有支持

噚日個市下半場都未開,喺我食緊啖北菇雞飯時,就不斷收到來自四方各地嘅讀者email,大部分都同我講佢哋呢個星期跟《輪證贏家》所推介嘅熊仔而從市場中賺到應該夠開心過聖誕嘅bonus,當中有兩位讀者同我講話會將部分賺到嘅錢,用「阿珊」嘅名義做慈善捐出去,聽到都覺得人間溫暖呀;如果要等恒指臨收市前再嚟多次跌600點嘅時候放走隻恒指熊(60172)嘅話,咁就真係要跳返part十字步,再唱「唏呀唏呀唏呀唏呀唏…」(如果你熊證注碼係大嘅話,應該可以喪loop幾分鐘)。

今朝早起身見到電視機右下角出日經粒數係升好似200幾點,心諗:其實恒指都跌咗兩個星期啦,噚日條50天線這邊廂交稿,那邊廂穿埋,就連保歷加通道都無埋,確係將我哋嘅目標一下抵步;再者噚日都有提過大家,正因為恒指條「下降通道」築得咁明顯,啲技術分析都已經由之前嘅超買或者偏高水平,紛紛落到去超賣,甚至係嚴重超賣,就算唔隨時反彈,都可能跌勢放緩,咁樣對大家都無好處。今日(截至依家10點13分計)恒指由朝早升過200點,到依家升14點(中途我寫緊個地址寄去新城財經台寄月曆時有見過倒跌過,我真係見過);之但係個市仲落唔落,還是條100天線(28122點)靠得住呢?睇睇恒指牛熊證街貨圖有無啟示啦。

如果純粹用恒指牛熊證街貨圖嚟計數嘅話,依家10點27分,用恒指暫時做過嘅低位28205點計,即係最貼價嘅牛證28200至28299點嗰258張期指都被食得八八九九;變相依家最貼價嘅牛證就係28100至28199點,呢度有相當於600張期指,再落多100點嘅話就勁啦,係28000至28099點呢度有成1080張期指。

再睇返熊證嗰邊,最貼價嘅係29400至29499,呢度有相當於769張期指,之後對上嘅街貨,每100點範圍都係得嗰百零張,都幾反映到淡友們見噚日恒指食咗瀉藥之後就拿拿聲將隻熊證收割,之後有無將啲錢袋入袋,還是嚟個反手就睇吓個人嘅進取度啦(見啲牛證愈儲愈多,都幾證明到大家係非常進取)。

睇返恒指日線圖,14RSI見36.79,正式尚未進入超賣區;Slow STC(14,3)%K線同%D線分別報2.915同8.886,嚴重超賣到近乎無得再超買,怪不得今日個市好似練咗輕功,喺條100天線上飄。

市就似乎跌定,技術分析似有鐘擺向上嘅跡象,但牛證嘅街貨又重又近,呢個誘惑實在難以抵擋,反正一連幾日揸住隻熊仔掃蕩咗唔少牛證返嚟,今日就休息一日,持盈保泰。

作者阿珊,從事財經及投資版報道超過10年,由平面媒體走到網絡世界。相信技術分析,由窩輪到牛熊證無一不炒,唔貪心,志在搵餐下午茶。

電郵:[email protected]

回上

信報簡介 | 服務條款 | 私隱條款 | 免責聲明 | 廣告查詢 | 信報會議中心租賃 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。