|
熱門:

2017年11月15日 即巿股評 港股直擊

【盤房來料】騰訊績前唔精神 港股暫時無運行

噚日港股午後表現已弱弱地,外圍股市拖累,歐美股市唔識升,日本股市跌唔停,仲要內地股市申多一腳,幾面夾攻之下,港股今日回落。恒指低開逾百點後,跌幅曾收窄至45點,上過29106點半日高位,但內地股市跌幅擴大,拖累港股插深啲,半日最多啲235點,見埋半日低位28916點,中午報收28937點,跌214點;國指仲大鑊,跌175點,報收11429點,連失兩條移動平均線,更逼近50日線(11366點)。恒指唔好得去邊,暫時險守10日線(28915點),失守落番20日線(28618點),呢一輪升浪又玩完。

自從三桶油被燈神祝福過後,由強轉弱無運行,隔晚油價回落,三桶油今日仆直,跌幅超過3%。燈神何止祝福三桶油,上周騰訊(00700)創上市新高後,一直唔睇好騰訊嘅佢,仲話騰訊會趁業績挾多浸,結果騰訊連390元都企唔穩,半日再跌3元或0.7%,險守阿Man個建議撈貨價385元,留意382元不能失守,否則真係凍過水。

不過根據往績紀錄,騰訊出業績前股價回軟,之後升嘅機會大,反之亦然。騰訊要到今日收市後先派成績表,即係要博一博過夜,方能決勝負。阿Man長線好騰訊,但上半場騰訊表現確係令人失望,暫時叫險守385元,唔重上388元企穩,走勢上都係差,有啲濕滯。

呢兩日強勢股份友邦(01299)同港交所(00388),前者回吐0.7%,暫時又去到65元警界線附近,睇住65元呢個位,若失守有貨嘅缸邊友最好先止賺。港交所情況亦不妙,不過阿Man講過,上星期出完業績見過235元,噚日雖然238.8元,但未能一氣呵成升穿240元企穩,港交所不過係炒上落,暫時支持位上移至230元,230元失都係先離場。話晒港交所上面多層蟹貨區,總不能期望過高。

內地股市回復弱勢,中資金融股腳軟,內險股全線向下,跌幅至少講緊1.5%,強如平保(02318)亦難逃一跌,其他內險股跌幅更大。至於內銀股本來已較內險股落後,升唔見追得上,回又回得多過人,當中工行(01398)跌1.3%,為三隻重磅內銀股中跌幅最大。

科技股全線向下,只有阿Man叫留意嘅準「港股通」新貴鴻騰(06088)逆市向上,始終此股之前較高位回落不少,如今扭轉跌勢回升,至少要逼近6元,能企穩可再挑戰6.5元,止蝕同止賺位現推高至5.5元,收市唔守呢個價,都係先離場穩陣。

麥狄文
(徐狄怡‧證監會持牌人)

回上

信報簡介 | 服務條款 | 私隱條款 | 免責聲明 | 廣告查詢 | 信報會議中心租賃 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。