|
熱門:

2017年11月15日 即巿股評 港股直擊

【輪證贏家】騰訊業績如何 恒指走勢也應如何

噚日同個舊同事Jarvis食lunch,幾多年無見?大家都數唔出啦,只係知道佢剛剛quit咗份「媽劇亭」嘅工。上個星期佢忽然搵我問吓閱文(00772);噚日lunch傾計都有問吓個市,講真我又唔係啲咩專家,問我把鬼咩,我都只係將當下個市況講比佢知咁解,佢話依家個市好難睇,我話:咁可以玩個股嘅(反正我噚日都係咁講)。

如果玩個股,都真係可能有人會追隻友邦(01299),被幾間大行唱好之餘又無情白事被大戶欽點咗接平保(02318)力,推高恒指嘅升市股神,但可惜呀,咁推法啲技術指標都出現超買,今日就更加隨市下行。無計,依家個市嘅節奏快到阿媽都唔認得,鬼叫依家資訊同科技都咁發達咩。

睇返今日,焦點就梗係隻企鵝騰訊(00700)派業績啦,不過未派成績表之前,今日恒指失守29000點關口,騰訊日線圖都踩返落去條10天線(381.8元)附近,事就無咩嘅,因為騰訊由上個星期二(11月7日)至今築咗個「長方形」出嚟,頂就上星期三(8日)高位398.6元,底就係上星期二低位380.2元,即係話騰訊有咩事撻Q嘅話都仲有條10天線同「長方形」底托住,穿唔穿就睇佢份業績嘅做化啦。

又睇返個市,今朝喺屋企咬住件莎莉蛋糕時,電視右下角show緊日經粒數係紅色嘅,然後個Anchor小姐就話:「港股ADR普遍下挫…」哼,真係「莎莉…多謝你」,如是者就預咗今日恒指都係無乜運行。依家10點27分,拆恒指5分鐘圖見到一個大裂口出現,都唔係重點,重點係喺10點10分見到恒指失守29000點,暫時低位見過28944點。

即刻load個恒指牛熊證街貨圖睇啦,恒指本來喺熊證最貼價嘅範圍架嘛,今日轉身射個三分波就射咗去牛證最貼價28900至28999點嗰邊,呢度有相當於452張期指嘅貨,而牛證重貨區就係28500至28599點呢度,有相當於1750張期指,又真係除非騰訊出嚟個業績搞到成地眼鏡碎啦,否則唔似會一下子再跌多400幾、500點囉,事關落到去牛證重貨區嘅話,技術上恒指要跌穿條20天線(28621點)先得。

上方熊證又如何?依家10點35分,恒指做緊28998點,跌153點,係有跌定嘅跡象嘅,因為分鐘圖都見到恒指跌到落去暫時低位28944點之後,技術指標都已經無位再比佢跌。如果個市29000點失而復得嘅話會唔會好啲?本身29000點呢個係大關口嘅數,係會着緊少少嘅,但若然呢個位失而復得又得而復失再失而復得咁樣來來回回嘅話,意義就不大啦。

雖然恒指之後嘅走勢(講到依家10點40分為止)都真係跌定兼上返29000點樓上(幾快又失而復得),但日線圖見到除咗啲技術指標係發出向淡嘅訊號之外,佢自己本身條「上升軌」今日都斷纜啦,就姑且等騰訊份業績啦;恒指同騰訊=兩生花,無人反對架嘛,係咪?

作者阿珊,從事財經及投資版報道超過10年,由平面媒體走到網絡世界。相信技術分析,由窩輪到牛熊證無一不炒,唔貪心,志在搵餐下午茶。

電郵:[email protected]

回上

信報簡介 | 服務條款 | 私隱條款 | 免責聲明 | 廣告查詢 | 信報會議中心租賃 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。