|
熱門:

2017年10月17日 即巿股評 港股直擊

【盤房來料】呢個位考起缸邊友

美股係咁矣抖一日,隔晚三大指數又創收市新高,但係港股跟唔上,今早表現反覆,高開低走倒跌後又上番嚟,恒指波幅唔夠150點,又係悶死人嘅格局。恒指高開84點報28777點,係上半場高位,連28800都唔見到就掉頭向下,最多跌51點,報28642點半日低位。不過28600又冇失守,結果收復失地再升過,半日升51點,報28744點,呢個位考起缸邊友,唔上唔落半天吊。國指變化唔大升22點,半日報收11625點。

騰訊(00700)明日除淨前未見搶高,只係得個閱文認購權又無息派,點會吸引好息之徒入場。至於有關優先預留認購閱文集團,噚日已到咗最後限期。集團已公布至少要有1256股或其完整倍數,先有資格優先認購1股預留股份,咁搞法要幾多手騰訊先夠優先認購一手閱文。對於散戶同小股東嚟講,今次優先認購閱文集團又係得大戶玩晒,小股東同散戶要早抖。今次閱文預留股份亦無北水嗰份,騰訊擺明益晒大戶同外資,可能怕咗北水嗰種快來快去嘅手法,若然閱文睇中長線,亦唔多適合愛暴炒嘅北水同大媽。

其他重磅股無乜睇頭,友邦(01299)星期五公布季績,次次都係業績前已偷步炒定先,反而到公布嗰日小心好消息出貨。至於其他重磅股,大笨象(00005)繼續發吽逗,港交所(00388)噚日喺小加同志澄清未有減免印花稅計劃後,升幅縮水今日回吐,不過股價仲企喺220元樓上未死得,但明顯230元有阻力,可能又要玩區間上落。

石藥連彈兩日

話咗資金都係板塊逐個輪流炒,既然汽車同內房股暫時冇運行,呢兩日流去炒醫藥股,話咗石藥(01093)批股後守得住13元要留意,已經連彈兩日,上得番13.28元10日線上面,又可再重新組織升勢。另一個有資金追嘅板塊係教育股,阿Man早於第一季推介兄宇華教育(06169)再創新高,半日升6.8%,現價早已超額完成當初3.5元目標價。其他教育股普遍上升,之前叫留意民生教育(01569),又係升至2元附近掉頭,睇嚟2元阻力唔少,要再創新高,先要突破呢一關。

麥狄文
(徐狄怡‧證監會持牌人)

回上

信報簡介 | 服務條款 | 私隱條款 | 免責聲明 | 廣告查詢 | 信報會議中心租賃 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。