|
熱門:

2017年10月13日 即巿股評 港股直擊

【輪證贏家】恒指仍然無方向

今朝坐地鐵返工時,坐我對面嘅太太上車嗰一刻,到我哋一齊喺北角轉車,至我喺灣仔落車佢都未落嘅呢段車程入面,佢同電話嘅另一端講起佢個細路(應該係幼稚園)之日常,重點當然係功課啦,竊聽到佢個小朋友放學後要寫幾多個中文同英文字(因為聽到佢話要寫10個J同10個Q兩行英文字母,所以先估係幼稚園生),做做吓功課個細路係瞓著咗,跟住呢位媽媽就同電話另一端講每日要點樣督促住個小朋友做功課,BTW佢仲有九萬幾樣「課外活動」;我聽完當然戥個小朋友慘,而坐喺我隔離個男人望住嗰位媽媽斬釘截鐵+自然自語地細細聲講:怪獸家長!無錯,呢個男人咪就係我家老爺囉。

返到公司準備打稿時收到老友Marilyn嘅whatsapp,send嚟嘅只係一張相,相中只有一堆文字同一個紅色大交叉:農場有半和豬共323,牛比羊多147隻,而豬又比牛少294隻,共有羊和牛多少隻?,然後再來多一個whatsapp:Pls help。我對住個芒讀條題目一次都覺得好複雜,或者大人諗嘢係比細路複雜,第一時間我只能用代數去計呢條數,然後戰友Jack比咗個簡易版嘅去計個答案,到最後我先發現Jack用番啲豬牛羊同我用XYZ都係同一個方法之嘛,巴閉。

咁鬼得閒兩條友坐喺度計數就知個市悶到核爆咁滯啦,依家10點38分,恒指做緊28435點,跌23點,日線圖上又再次出現待變嘅「十字星」,而噚日講嘅「長方形」則仲健在,呢啲咁嘅波幅,買嘅輪嘅分分鐘輸Vol輸死。

開恒指牛熊證街貨圖睇,上方熊證最貼價嘅係28600至28699點,呢度有相當於706張期指,若然個市由依家(10點44分見28433點計)上到呢個位仲要食晒呢堆熊仔嘅話,咁就要個市由依家起標上行266點,而一旦照住咁行嘅話,同時代表個市升穿咗個「長方形」頂(約28625點)。

至於下方牛證,最貼價嘅係28300至28399點,呢度有相當於166張期指,若然要個市食晒呢堆貨嘅話,咁就要個市向下行多133點,係就係近,不過得嗰166張期指個吓先大獲呢。

就嚟11點都唔覺得個市有咩大作為,keep住用個「長方形」做短trade先啦,懶得郁嘅咪Happy Friday囉。

作者阿珊,從事財經及投資版報道超過10年,由平面媒體走到網絡世界。相信技術分析,由窩輪到牛熊證無一不炒,唔貪心,志在搵餐下午茶。

電郵:[email protected]

回上

信報簡介 | 服務條款 | 私隱條款 | 免責聲明 | 廣告查詢 | 信報會議中心租賃 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。