|
熱門:

2017年10月12日 即巿股評 港股直擊

【盤房來料】平保完成調整有望向上突破

美股真係唔得笑,隔晚三大指數又創收市新高,帶動港股喺夜期同ADR時段回升,收復番 28400 失地。恒指今早高開41點,其後表現反覆,曾倒跌46點,見過28343點半日低位。盤中最高見28472 點,中午報收28464 點,升75點。國指呢兩日都跑贏恒指,半場報收11501點,升89點。噚日講過兩隻恒指重磅孖寶騰訊(00700)同大笨象(00005)將會主宰大市命運,雖然噚日大市急回,但呢對孖寶尚算硬淨,加上夜期見過 28425 點低位,叫做搵咗短線個底,今日能夠重返28400之上,支持力度有番咁上下,即係又唔死得,只要再突破28550,呢個月仍有機會挑戰二萬九。

騰訊又創新高,見過353.8元,但升勢唔算強勁,半日報收352.2元,只係升咗六粒神咁大把。至於大笨象暫時飛唔郁,但77元守得住,79元又頂鬼住,不過今晚花旗嗰邊陸續有大型金融機構派成績表,只要放榜成績好過預期,隨時可帶動大笨象起飛。噚日份施政報告未有公布首置計劃細節,陀地地主嚇親打冷震,唔少都先升後倒跌,仲回得幾急。不過今日板塊已見回升,當然未能扭轉噚日急回嘅劣勢,但總算企番穩,整固一吓又可再組織升勢。

汽車股今日生猛番晒,其中一隻阿 Man 愛股華晨中國(01114)得到高盛祝福,將目標價大幅調高一倍有突至28.8 元,評級亦調高至「買入」,一度刺激股價升至 23 元,半日報收 22 元,升 3.5%,暫時跟開市價持平。板塊內股份個別發展,呢個板塊處於調整期,暫未回復強勢。

內銀股跟內險股,係近期阿Man 睇高一線板塊,而噚日跌市內銀股亦表現硬淨,一旦十九大有利好消息刺激呢兩個板塊,隨時係推升大市再創新高嘅另一主要動力。內銀股都係mark住建行(00939)同工行(01398);至於內險股唔使諗,幾時都係平保(02318)先行,今日走勢亦理想。內房股表現參差,暫時難言恢復強勢,個別龍頭內房靠穩,但次一線內房股仍見逆市回吐。短線內房股要抖抖,阿爺啱啱先出招調控,總需要時間去消化利淡因素。

麥狄文
(徐狄怡‧證監會持牌人)

回上

信報簡介 | 服務條款 | 私隱條款 | 免責聲明 | 廣告查詢 | 信報會議中心租賃 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。