|
熱門:

2017年9月14日 即巿股評 港股直擊

【盤房來料】又係騰訊一股救全家

美股隔晚三大指數齊創新高,可惜港股未能拍住上,反而發軟蹄,再度考驗10日線(27783點),午後若未能收復,20日線(27692點)都凍過水。講咗N次,恒指唔企穩27800至27900,暫難言回復強勢,繼續區間上落,甚至有可能再作調整,暫時用番27400至27500作短線支持,失守的話,機會再考驗50日線(27194點)。

恒指低開105點,雖然曾收復失地,但27895點半日高位見一見又回頭,連27900都上唔番,好友似乎失勢。上半場最多跌140點,半日低位27753點,10日線宣告失守。半場報收27776點,跌117點;半年已示弱嘅國指再弱啲,半日跌84點,報收11102點。

又係一股救全家,若非騰訊(00700)成功打破333元魔咒,半日升3..8元或1.1%撐住個市,睇怕條20日線亦失守。可惜單靠騰訊一股力量實不足,其化重磅股普遍下跌,內銀股同內險股都唔精神,大笨象(00005)又唔識郁,個市難有運行。

藍籌股只有內需股逆市做好,蒙牛(02319)創兩年新高,半日升3.8%,係藍籌升幅冧巴溫,恒安國際(01044)同中國旺旺(00151)分別升2%同1.9%。內房股抖咗兩日又翻生,阿Man推介過嘅萬科(02202)創27.35元新高,碧桂園(02007)亦創12.7元新高,可惜嘅係半場未能高收,升幅收窄。其實金九銀十對內房股有一定支持,估計內房股會一直以大漲小回步速繼續向前。

噚日提過蘋果概念股要大唔要細,今日繼續兩極化,又係一對龍頭最威威,舜宇光學(02382)再創128.4元上市新高,半日升2.9%,報收127.6元,北水積極掃貨,難怪舜宇愈升愈有。瑞聲(02018)亦唔執輸,半日升1.2%,報收143元,又即管等吓瑞聲能否再突破之前高位。至於其他手機設備股個別發展,暫時都係集中火力睇住兩隻龍頭。

大市繼續喺現水平磨爛蓆唔係好事,目前回補裂口27650機會大增,留意20日線可穿不可破,否則再次步入調整。不過阿Man話之佢,只要資金繼續板塊輪動,唔怕無股炒,炒股唔炒市,下月十九大前,阿爺維穩難大跌,一日諗住股災嘅朋友,繼續靠邊站,分分鐘等到變長頸鹿,亦未等到股災嗰日。

麥狄文
(徐狄怡‧證監會持牌人)

回上

信報簡介 | 服務條款 | 私隱條款 | 免責聲明 | 廣告查詢 | 信報會議中心租賃 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。