|
熱門:

2017年9月13日 即巿股評 港股直擊

【盤房來料】手機設備股一定揀龍頭

隔晚美股三大指數創收市新高,以為港股有得食住個勢上,可惜高開低走,早段更曾跌逾二百點。恒指高開12點,一見27984半日高位即掉頭,早段最多曾跌220點,低見27751點,曾失10線(約27802點)。不過27800點似乎又守得住,中午收市前跌幅收窄至82點,收報27889點,跌82點;國企指數報11191點,跌50點。

蘋果隔晚發布會,唔少果粉包括阿Man都睇足全程,當然中間睇到Apple TV好鬼眼瞓,但為咗一睹iPhoneX風采,頂硬上捱落去。結果呢部新機最爆係Face ID功能,實際係咪咁好用未知,至少阿Man個人偏愛Touch ID多啲,吓吓要望住部電話先開到機,呢吓都幾麻煩。不過新技術令保安加強20倍,都係一個賣點。反而阿Man對第三代Apple Watch興趣較大,已升級至可作流動通訊器材用,只可惜香港唔支援呢個版本,即係又慳番三千蚊。

買大唔買細

阿Man捕住發布會,目的係想睇吓新產品對手機設備股有乜影響,一句講晒,瑞聲(02018)同舜宇(02382)又可以坐得安安樂樂,無論語音系統跟光學系統要求更高,對呢對龍頭孖寶係好事。前者目標價調高至170元,後者暫時調高至150元,仲追唔追唔敢講,唯一肯定係有貨繼續坐定定。整個板塊嚟睇,擺明因為技術要高咗,買大唔買細,始終係技術專利方面,瑞聲同舜宇一直跑贏同業。

紙業股強勢持續,破頂唔估頂,追貨免問,持貨無問題,直至走勢出現逆轉走人亦未遲。提醒大家係紙業股開始炒到龍尾,一旦得番啲龍尾股升,龍頭股唔行,有貨食咗先無壞。

至於混改股又炒,中建材(03323)復牌回一回,今日升勢再現,半日升8.7%,而被中建材以換股方式合併的中材股份(01893)半日升8.4%。水泥股亦見異動,海螺水泥(00914)創兩年高位,之前推介過嘅金隅(02009)橫行已久,希望今次突破能升穿4.3元,否則又係得個桔。

麥狄文
(徐狄怡‧證監會持牌人)

回上

信報簡介 | 服務條款 | 私隱條款 | 免責聲明 | 廣告查詢 | 信報會議中心租賃 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。