|
熱門:

2017年7月17日 即巿股評 港股直擊

【盤房來料】港交所破晒位要開快車

上周五美股繼續做好,耶媽一聲放鴿,市場放心入市,道指跟標指再破頂。當晚港股ADR同夜期已偷步向上,今朝個市開得鬼咁高,誰知內地股市食咗瀉藥,嚇到個市一度縮番晒仲倒跌。喺內地公布GDP後,個市竟然插水,其實GDP表現都唔錯,內地股市插水,原來係創業板反艇。主要原因係近日多隻創業板大市值股票,派中期成績表不理想,加上全國金融工作會議提及要提高直接融資比重,令投資者擔心未來擴容壓力加大,令內地股市開市後早段大跌。

不過港股市底確係強勁,喺內地股市跌幅收窄後,港股亦行番上去。恒指高開183點,一度高見26618點逾兩年高位,其後隨A股插水,港股亦乘機回吐,恒指曾倒跌35點,見26354半日低位。之後內地股市跌幅收窄,港股回升過百點,恒指半日收市報26542點,升152點;國指升118點,報收10846點。

重磅股普遍表現理想,除咗大笨象(00005)吽住喺75元整固之外,其他騰訊(00700)、平保(02318)同港交所(00388)都再創年內高位。平保同騰訊呢啲強勢股,話咗破頂唔好估頂,平保更獲多間大行上調目標價,都係回頭太難咁款。至於港交所,上周阿Man先表示破咗位即飛天,結果股價今日早段落過208元企穩,頭也不回再上214.6元今年高位,家陣又破咗213元,只要企定定喺呢個水平之上,220元呢個目標都走唔甩。

濠賭股跑輸,有大行報告話中澳兩地打擊洗黑錢活動,令濠賭板塊面臨流動性壓力,整個板塊嘔白泡,而澳門遲遲未公布續牌細節,為濠賭股平添不明朗因素,暫時呢個板塊仍要向下尋找支持,咪貪跌就多手撈貨。阿Man一向主張買上唔買落,寧追當頭起,莫買當頭跌,呢個板塊睇定啲先算。

至於上周五見內房股又落鑊,建議睇番富力(02777)同合景泰富(01813),今日整個內房股板塊升勢放緩,預計只係抖抖氣,後市仍向好,內房股儲一儲力,隨時又嚟料,點都要有貨傍身。中聯重科(01157)順利升抵首個目標價4元,只要企得穩喺呢個水平之上,仍有條件行遠啲,穩陣計用4元做番個止賺,碌番落去就食咗糊先。

麥狄文

(徐狄怡‧證監會持牌人)

回上

信報簡介 | 服務條款 | 私隱條款 | 免責聲明 | 廣告查詢 | 信報會議中心租賃 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。