|
熱門:

2017年6月27日 即巿股評 港股直擊

【盤房來料】細價股斬倉火燒連環船爆股災

噚日大市終止四連跌,恒指一口氣收復10日(25764)同20日線(25826),急升201點。不過今日只係靠穩,暫時二萬六成為阻力,除非突破兼企穩,否則結算前繼續玩幾百點波幅,而唔會有太大升幅或跌幅。恒指略為高開39點,之後曾倒跌16點,見過25856點半日低位,最多升過57點半日高位25930點。至於國指今日跑輸大市,半日跌22點,報收10508點。

騰訊(00700)旗下手遊業務又報捷,今早再強勢破頂,高見288.4元,半日升1.2%或3.6元,報收287.6元。明明隔晚納指見腳軟,但今日港股呢邊啲科網股,喺騰訊帶領下表現唔錯,除咗股王破頂,瑞聲(02018)亦重返紅底股行列,最高見101.5元,半日收100元,能否保住呢個身份,當然要睇埋下半場。阿Man愛股之一嘅舜宇光學(02382),連日節節上升屢創新高,今日再升至74.3元上市新高,半日報收73.05。其他科網股表現唔錯,資金始終留戀呢個強勢板塊。至於內險股同內銀股偏軟,唔少高開低走,創完新高後回落,兼且半場倒跌,若非騰訊勁升,大市應該連呢廿點升幅都冇埋。

吉利(00175)宣布將買賣單位由每手5000股改為1000股,減低最低消費,可以受埋多散戶玩,股價又創上市新高16.46元,半日股價升4.6%,報收16.24元,係半日升幅最大藍籌。至於噚日被一招魔笛追魂唱起嘅中銀香港(02388),今日續創上市新高37.95元,半日就企住呢個位高收,兩日合共急升一成。

雖然今日指數仍錄得些少升幅,但望見股份升跌比例又唔開胃,上升股份僅440隻,下跌股份又逾千隻。再望埋個跌幅榜,當然知道係細價股股災,頭廿大跌幅股,最輕傷都跌三成,跌幅冠亞季軍全部插水九成以上,真係冇乜幾可。股仔急挫唔出奇,但咁多隻跌幅都咁大,當然有景轟,想知今日細價股股災內裡乾坤,留意《信報》明日嘅《金融街密語》。

麥狄文

(徐狄怡‧證監會持牌人)

回上

信報簡介 | 服務條款 | 私隱條款 | 免責聲明 | 廣告查詢 | 信報會議中心租賃 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。