|
熱門:

2017年6月19日 即巿股評 港股直擊

【盤房來料】今日反彈再減磅

當冚世界轉軚睇港股要跌,今日偏偏大幅反彈逾200點,唔單止收復20日線(約25750),仲一口氣連10日線(約25856)都收復埋,皆因外圍股市做好,就連積弱嘅內地股市都曉得升,港股當然不甘後人。

恒指今早跳gap高開109點,雖然曾落過25735點低位,但大部份重磅股做好,恒指一舉突破埋10日線,暫時喺10日線附近上落。恒指中午報收25868點,升241點;國指則升142點,報收10527點。

恒指雖然收復10日線,但仍未算企穩,要港股回復升勢,必要企穩10日線,最好能夠上番25950水平,否則將會cap死喺10日線及20日線之內。大市反彈唔多唔少係缸邊友賭A股入摩,周三凌晨會有結果,其實A股今次成功入摩,象徵意義大過實際刺激,預計A股即使納入MSCI新興市場指數,佔比最多都係0.5%,所涉資金唔夠100億元,兼且仲要明年先實行,即係追蹤相關指數嘅基金,有成年時間先要入貨,唔排除好消息公布,反而係出貨藉口。

有缸邊友認為7月香港回歸廿周年,阿爺會出手維穩,查實恒指已處於半年高位,唔需要再特別加顧,反而內地股市死死吓,阿爺要救不如先救A股。反而內地房貸利率趨升,帶動內銀息差拉闊,內銀股業績料可睇高一線,吸引資金掃貨。

內險股升幅亦顯著,睇嚟安邦事件負面情緒終淡化,平保(02318)升2.6%;國壽(02628)升2.5%;新華保險(01336)升1.9%;財險(02328)升2%;太平(00966)升1.7%;太保(02601)升1.2%。友邦(01299)仲厲害,再創超過兩年高位,半日升1.5%,高收56.75元。

火車頭即係火車頭,騰訊(00700)半日股價升1.3%,半日報收276.2元,仍然守住10日線及20日線,有缸邊友話等買平貨等到頸都長。至於港交所(00388)推行新股改革諮詢,無論開唔開新板都好,港交所具壟斷地位,除非港股真係拍晒烏蠅,否則港交所仍有其可取之處。只係今日咁大個裂口高開,呢啲走勢唔算靚仔,隨時有落番去20日線(199.9元)嘅危機。

阿Man寧願等大市出現較顯著調整再買貨,今日反彈再減磅,除非大市確認回復強勢,目前都係增持現金較穩陣。

麥狄文

(徐狄怡‧證監會持牌人)

回上

信報簡介 | 服務條款 | 私隱條款 | 免責聲明 | 廣告查詢 | 信報會議中心租賃 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。