|
熱門:

2017年6月19日 即巿股評 港股直擊

【輪證贏家】恒指牛小心為上

上個星期五(6月16日)揀咗隻可以做day trade嘅恒指熊(62321),同埋過夜恒指熊(69318),但等咗成日恒指都只係打橫行,去到下晝約3點10分,恒指忽然開倒車向下走;只可惜嘅係由頭到尾喺恒指5分鐘圖上根本就無見過超買(包括SlowSTC(14,3)同14RSI),成日坐喺度住個市食白果。

不過,當今日做完U盤之後,就發覺「其實食白果又有咩好怕喎!」今朝恒指裂口高開過百點開市,開市報25736點,未行到返公司,戰友Jack已經whatspp我話個市已經升過200點,佢仲同我講以為自己睇錯添。返到公司搵老友MK幫手出咗淘寶啲貨之後,再坐返埋位睇電視,此時恒指係咁創新高。到咗10點11分,恒指做咗個高位25883點,用呢個高位計恒指已經成功重返10天線(25857點)同20天線(25751點)樓上。從日線圖睇恒指依家似乎係高位做緊個「圓底」,頸線位就要用6月9日高位26090點呢度,要上破唔係話無可能,因為呢個moment SlowSTC(14,3)嘅%K線同%D線由6月9日嘅92.62同93.39雙雙回落到依家嘅24.61同31.67,依家呢個水平雖然未至於係嚴重超賣,但數值上比較反映大市或已完成今期調整,調整完囉咪又再上過;話口未完依家10點17分,恒指高位已經變咗25895點啦。

若然恒指向上走嘅話,咁即係想食熊證啦,開恒指牛熊證街貨圖望吓,26100至26199點仍然係熊證重貨區,呢度有相當於1127張期指。而最貼價嘅熊證就係25900至25999點,呢度有相當於433張期指;如果用恒指暫時高位25895點計算,即係話個市仲有5點就可以踏入呢個範圍。

咁啲牛證呢?或者經過上個星期嘅調整,今日見到牛熊證街貨圖上嘅牛證相對應嘅期指張數都出現負數,即係話唔排除有錢見到大市回調而先行將牛證收隊,不過重貨區仍然都係25200至25299點,有相當於1066張期指;至於最貼價嘅牛證就係25500至25599點,呢度有454張期指。依家10點23分,恒指現價做緊25877點,若然要恒指先踏入呢個範圍,就要大市由現價開始下行278點;對比起向上行去熊證區只有5點嘅差距,睇嚟大市真係撲熊嘅機會多過撲牛。

恒指牛(61420),收回價25500點,同現價有逾300點兼且有76倍槓桿,絕對係day trade之選,同樣地吼恒指5分鐘圖見超賣先好入市;真係唔好揸太耐,因為見到保歷加通道口有收窄跡象,可能同上個星期回調有關吧!但都係小心為上。

作者阿珊,從事財經及投資版報道超過10年,由平面媒體走到網絡世界。相信技術分析,由窩輪到牛熊證無一不炒,唔貪心,志在搵餐下午茶。

電郵:[email protected]

回上

信報簡介 | 服務條款 | 私隱條款 | 免責聲明 | 廣告查詢 | 信報會議中心租賃 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。