|
熱門:

2017年5月24日 即巿股評 港股直擊

【盤房來料】騰訊超買要回調但幅度有限

阿Man先喺呢度同各讀者「沙個冧」,由於噚日忙中有漏,竟然未有將已完成嘅《金融街密語》發稿到信報,搞到班編輯大佬真係唔好意思,經安排後本周《金融街密語》順延至明日見報,希望大家同樣啱睇。

講番個市真係同天氣一樣咁悶,雖然歐美股市隔晚屹立不倒,但港股連升三日疲弱盡現,尤其喺25500點之前,要成功向上突破唔係咁容易。既然上唔到就要掉頭,不過港股市底無可否認係強,應該話騰訊(00700)無可否認係強,即使回調幅度亦有限。

恒指低開20點,早段轉升13點後低走,一度跌106點,見過25297點半日低位,不過10天線(約25275點)水平有支持即彈,再掉頭回升16點,見25419點半日高,其後好淡爭持,開始進入膠著狀態。恒指中午收報25365點,跌37點或0.1%,大市成交額373.4億元;國企指數報10356點,跌38點或0.4%。

本來喺瑞聲(02018)事件開始時,唔少缸邊友仍對科網股板塊有依戀,但瑞聲再度停牌,繼再發生科通芯城(00400)被狙擊,停牌報公安,資金已相繼逃出科網股。通達(00698)急跌更加速缸邊友沽貨信心。即使金山軟件(03888)交到份靚業績仍難逃一路,其他股仔坐住唔話唔驚驚。

每當科網股腳軟,被沽壓包圍之際,又係輪到傳統股接力,唔單止內房股表現突出,當中更有恒大(03333)及龍湖地產(00960)雙雙創新高,而弱足一季嘅資源股,亦嚟吓大翻身。鋼鐵股回勇皆因供給側改善行業,加快整個不僅可控制產能,亦有助提升產品競爭力。不過資源股除非堅嚟料,否則都係大幅調整後嘅反彈,不宜寄望過高。

噚日通達(00698)急跌,今日見反彈回升至2.45元或2.9%,不過幅圖壞咗係事實,短期好難救得番,頂籠係有反彈,冇上升,短期又係冇運行。今日輪到信利國際(00732)發盈警,口痕友話自首好過畀沽空機構篤背脊。公司預料今年首季股東應佔溢利按年下跌約70%,股價曾挫9.3%創逾52周新低,半日跌幅收窄至只有1.2%。而美圖(01357)跌穿10元後,反彈幅度唔大,鐘擺理論喺美圖身上唔多work,不過現價進一步逼近8.5元招股價,而上一升浪始於二月,當時起步位咁上下,短線有得博炒轉快嘅,只係10元樓上阻力重重,博反彈幅度亦有限。

麥狄文

(徐狄怡‧證監會持牌人)

回上

信報簡介 | 服務條款 | 私隱條款 | 免責聲明 | 廣告查詢 | 信報會議中心租賃 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。