|
熱門:

2017年5月19日 即巿股評 港股直擊

【盤房來料】科網股小股災後元氣大傷

美股反彈,皆因有企業盈利支持,話咗「侵侵」個人力量係整唔死環球股市嘅,港股亦見反彈,但升幅同波幅都有限,上半場定咗型咁滯。恒指高開25點曾倒跌至25124點半日低位,但條10日線(25111)仲守得住,升幅略為擴大至最高見25222點。恒指中午報收25215點,升78點;國指則微升3點,報收10274點。

騰訊(00700)今日除淨,股東成功搶息,股價半日升逾2%,高收269元。相反港鐵(00066)股東冇咁好彩,今日除淨後股價回吐,一度跌逾4%,半場跌幅收窄至2.3%,報收45.55元。其他藍籌股個別發展,中銀香港(02388)創上市新高34.35元,半日報收34.25元,升1.9%。

科網股噚日小股災後,今日未能回勇,只有股王騰訊同唉豬豬(00799)回升,其他科網股普遍再跌。噚日下半場一度大跌三成嘅科通芯城(00400),首季多賺逾四成亦無助股價反彈,公司雖然啟動回購,但亦未能阻止跌勢,今日半場再跌半成。阿Man兩愛股美圖公司(01357)跟金山軟件(03888)繼續向下尋找支持,半場再跌1%。睇嚟喺瑞聲(02018)未能解畫擊退蝙蝠俠之前,科網股短期難有運行,話晒科網股之前累積巨大升幅,仍有盈利在手嘅缸邊友,沽貨鎖定利潤亦無可厚非。

科網股走鬼,資金傳投傳統股,內房股再受追捧,中國恒大(03333)更創上市新高,半日升近一成。其他內房股全線向好,資金輪流炒,內房股靜咗咁耐,收集完成又再落鑊。

阿Man就睇番啲公用股,好似今年將改革嘅電力股,大唐發電(00991)近日喺跌市中表現淡定,股價未見太大調整,擺明有大戶收集,儲定貨等公司併購。另一隻可以留意係香港電訊(06823),今日恒指公司收市後將公布季度檢討結果,香港電訊有機會被納入恒指成份股,不過股價表現未算標青。至於另一黑馬舜宇光學(02382)跌勢未止,相信喺瑞聲事件未平息前,舜宇今次被納入成份股機會唔大。反而比亞迪(01211)同長汽(02333)被視為候選股份,半場股價表現同樣無特別,即管睇吓今日下半場有乜動靜。

麥狄文

(徐狄怡‧證監會持牌人)

回上

信報簡介 | 服務條款 | 私隱條款 | 免責聲明 | 廣告查詢 | 信報會議中心租賃 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。