|
熱門:

2017年4月21日 即巿股評 港股直擊

【輪證贏家】期結前造好?

噚日恒指又喺踏正3點鐘打後嚟一招鯉魚翻身,將個市由23900點水平推高返上去24000點樓上,就連條50天線都升穿埋,個市有番啲生氣之餘,熊仔都好「生氣」;今日再嚟多個裂口向上,晨早開市報24143點,升87點,唔使審,啲分鐘圖嘅技術指標全部被搶到高晒,按照一貫做法,個市喺正式開市之後個向上行多陣跟手先再回,不過今日又唔係喎,依家10點24分,準備完一陣邱達昌同有線單live之後,再睇返恒指5分鐘圖,第一粒燭高位24190點已經變咗依家暫時高位,跟手個市都忍唔住向下行番落去,到今朝10點10分先叫做停一停,跟住又再升過,所以依家喺5分鐘圖上恒指整咗個「V」型反彈出嚟。

番去睇返日線圖,恒指依家身處嘅位置剛好踩住條10天線(24144點),不過見日線圖上14天RSI同埋MACD都處於一個相對中軸水平,就只係得SlowSTC(14,3)嘅%K線(39.69)同埋%D線(28.80)仍然係一個偏低水平嘅位置,即使開埋DMI,都未見技術指標出現明顯嘅異樣。

技術指標無指示,就開恒指牛熊證街貨圖睇吓啦,依家10點32分,恒指現價做緊24159點,一開圖就見到24400至24499點呢度有一大堆新增嘅熊證,相當於期指1386張,成為咗新又明顯嘅重貨區;即使落100點,即係24300至24399點,呢度都有成849張期指嘅貨係度。用暫時高位24190點去度,其實24100至24199點嗰125張期指都已經被食得八八九九,所以依家最貼價嘅熊證貨區變成24200至24299點嗰124張期指。用現價計如果個市要食到上去重貨區嘅話,個市由現價向上升多340點就可以啦,計埋路經個堆熊證,total有2359張期指,都咪話唔吸引。

向下望牛證,果然真係有唔少錢流入貼價牛證度博反彈,喺23700至23799點呢度就有相當於1096張期指嘅牛證,但由於呢兩日個市升番唔少,再加上之前狠吃牛證,貼價牛證都未上得切市,所以要個市向下行食第二梯隊23700至23799點嘅重貨,講緊要由現價下行459點咁多。

咁計數個市似乎上行機會高啲,況且下個星期四(4月27日)就係期指結算日,慣例就話結算日前夕都會造返好啲個市嘅(但無人話過係一定做靚個市喎),有信心過夜兼下個星期續升嘅,恒指牛(65893),收回價23550點,同現價有逾600點差距,44倍槓桿都非常ok;但如果怕夜長夢多嘅,反而有兩個方法:一,做day trade,按照一貫用5分鐘圖睇超賣入牛,超買放牛嘅方法去做;二,咩都唔好做,買定包花生睇完邱達昌+有線條live之後,再睇住恒指收市。(熄機都得,電都慳番添)

作者阿珊,從事財經及投資版報道超過10年,由平面媒體走到網絡世界。相信技術分析,由窩輪到牛熊證無一不炒,唔貪心,志在搵餐下午茶。

電郵:[email protected]

回上

信報簡介 | 服務條款 | 私隱條款 | 免責聲明 | 廣告查詢 | 信報會議中心租賃 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。