|
熱門:

2017年4月7日 即巿股評 港股直擊

【盤房來料】侵侵特習之餘仲要突襲

無嘢難估得過政治市,當全世界焦點放咗係「侵侵」同「大大」嘅習特會之際,花旗那邊廂同敍利亞玩突襲,目的係回應敍利亞嘅毒氣攻擊事件,「侵侵」擺明同恐怖份子說不。

「侵侵」呢59枝導彈震散港股,恒指低開26點,報24247點係半日高位,其後輾轉向下,恒指失守20日線(約24201點)後跌勢轉急,一度跌291點,見23982點半日低位。半日恒指報收24137點,跌136點;國指報收10233點,點42點。

發炮開火刺激油價同金價向上,油價噚晚已偷步升超過1%,即係又有春江鴨知道侵侵玩突襲。金價亦升逾1%,個別黃金股逆市向上,招金(01818)跟靈寶黃金(03330)分別升2.4%及3.2%。油價向好帶動三桶油逆市上升,中石化(00386)創52周新高,高見6.55元,半場升1.5%;中石油(00857)跟中海油(00883)分別升2.8%及1.4%。有三桶油頂住,亦係恒指能守住喺二萬四之上嘅原因。其他重磅股普遍回落,大市整體股份升跌比例當然差,下跌股份超過一千隻,短線唔慌有運行。

不過喺半場收市前,跌幅收窄,睇嚟市場情緒逐步平伏,恒指喺24000水平有一定支持,今日跌幅應該差不多。問題係呢一吓下跌,算唔算係開咗邊,恒指有冇機會回補23800點上升裂口,呢吓真係兩睇。皆因踏入4月大部份投資者都認為呢一季要調整,包括阿Man在內,但大戶做嘢又點會跟大眾方向,當冚世界睇住恒指要落23800補裂口,偏偏就係唔順你意。今日若然收市又企番喺24150之上,繼續玩range有幾出奇。反正大戶short call又short put,鎖住幾百點磨到結算,齋食期權金一樣好飽,未必吓吓要劏肥牛同殺大熊。只係家陣恒指喺23800點有個上升裂口之餘,23800至23850係牛仔重貨區,從表面證供睇,大戶無理由成舊肥肉喺嘴邊都唔食啫。

提過新股高門集團(08412)算係有得炒,開市價0.36肯掃貨,0.38至0.4呢一段一定食到糊,半場升11%報0.38元。表面睇升幅少過主板進階發展(01667)嘅28%,但半場收市價係今朝開市價,即係開市衝咗入去又冇食糊,家陣打回原形。

麥狄文

(徐狄怡‧證監會持牌人)

回上

信報簡介 | 服務條款 | 私隱條款 | 免責聲明 | 廣告查詢 | 信報會議中心租賃 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。