熱門:

2015年11月18日 即巿股評 港股直擊

【盤房來料】港股險守頸線暫反彈力有限

今日盤房來料先唔講其他,要為阿Man今日喺《金融街密語》所犯錯誤沙個冧兼作更正,就係有關純官妹夫杜惠愷搞緊上市間公司豐盛機電,阿Man收錯風保薦人係鎧盛而唔係大唐域高。鎧盛背景實情係過往大福證券旗下分舵,即係又係彤叔自己人,曾經做過MEGA EXPO(01360)、百本醫護(08216)、創業集團(02221)等公司0既保薦人。鎧盛經驗有番咁上下,亦係幫自己友做保薦人,當然出多兩分力。

講番個市表現平平,雖然歐洲股市尋晚勁升,一度帶挈美股做好,奈何德國球賽炸彈疑雲,又勾起市場對恐襲嘅擔憂,美股幾乎抹去全部升幅,標指更倒跌收市。港股又未因此低開,反而見番22300樓上開市,但早段內地股市腳軟,港股轉升為跌,更一度失守22200點。暫時恒指守住頸線同50日線之上,10日線及20日線由過往支持變阻力,指數可能都係呢幾條移動平均線間穿梭,既冇好消息帶動向上,亦唔見太利淡消息可踩低個市,暫時冇乜好睇。

炒鬼今早有股落鑊,數字王國(00547)橫行幾個月後,今早異動升27%,登上升幅榜冠軍,股價升至0.51元高收,重上250日線。純睇走勢成交數字王國形勢大好,但提醒大家此股上面蟹貨唔嘢少,況且股仔好難有技術走勢睇。簡單啲講由資金主導,一旦炒鬼全線撤退,隨時可以冇晒影,急升兩成七追唔落手。

至於中再保(01508)失守2.7元,短炒理應打靶,寧待走勢突破重上2.7元靠穩再買貨,炒股寧買貴,莫買錯,呢個係阿Man炒股一大原則。科網股強勢繼續,阿Man心水孖寶科通芯城(00400)同網龍(00777)續升,繼續持有暫不切止賺,本來阿Man都係推介作中線投資。中線投資唔同短炒,止蝕要嚴守,但止賺較有彈性,尤其升勢未逆轉,唔急於食糊,有別於短炒股仔,走得快,好世界。

麥狄文

 

回上

信報簡介 | 服務條款 | 私隱條款 | 免責聲明 | 廣告查詢 | 信報會議中心租賃 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads