熱門:

2015年8月10日 即巿股評 港股直擊

【盤房來料】國企央企炒混改 炒鬼有股落鑊

港股確係有個性,內地股市插水就跟到足,偏偏今日上證一開已見上升,港股就偏偏唔跟,開波恒指更一度跌逾400點。幸而內地股市愈升愈有,上半場錄得超過3%升幅,帶動港股回升,主要係靠國企股帶動,今日個市係成也國企,敗也國企。雖然內地喺周末期間公布嘅經濟數據強差人意,而通脹數據更顯示內地或出現滯漲,本來預期降準減息嘅情緒冷卻。好彩兩大航運集團中遠集團同中海集團喺周末期間宣布正研究改革,旗下多隻股份AH股今日停牌,缸邊友對國企及央企混改滿有憧憬。

多隻熱炒航運股停牌,缸邊友即向其他國企板塊埋手,包括鋼鐵股同核電股都有資金追捧,阿Man幾個月前多番推介嘅上海電氣(02727)同哈電(01133),上半場分別升超過6%及12%。純睇技術走勢今日開始低位回升,今日成交亦較上星期平均成交額增加,睇嚟仲有得去,唔會一日玩完。

阿Man上星期已認為大市調整已接近尾聲,再觀察三兩日係時候重新出發,點解仲要觀察係因為大市回復升勢,要繼續吸引炒鬼入場參與炒作,持續性相當重要,板塊輪流落鑊唔係問題,問題係板塊急升後回頭,能否企穩支持位保持上升勢頭,若然炒一兩日又無影,成交再度縮水都係徒勞無功。

除咗受惠一帶一路嘅水泥同鋼鐵板塊,阿Man認為核電股亦有政策支持,為咗放大經濟效益,核電股改革整合係遲早嘅事。呢個板塊阿Man睇好中廣核(01816),晒士屬重量級,波幅未必夠晒士市值略細嘅同類股份勁,勝在估值同收益均見逐步增長,作為中線投資現價買入贏面甚高。目前唔少股份彈到20日或50日平均就行人止步,升抵呢啲水平唔反對先食一食糊再候低吸納。

麥狄文

回上

信報簡介 | 服務條款 | 私隱條款 | 免責聲明 | 廣告查詢 | 信報會議中心租賃 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads