熱門:

2015年8月3日 即巿股評 港股直擊

【盤房來料】上證失守3600 國家隊又要出動?

周末內地公布官方7月份PMI未如人意,依然係挨住50呢個盛衰分界線,而今早財新傳媒公布嘅財新中國PMI終值較初值下調,仲要係兩年以嚟最低位,反映中國製造業持續放緩。咁差嘅PMI指數一出,上證指數當然難逃一跌,拖累港股齊插水,尤其係財新一公布PMI嗰一吓,期指由開市24500點水平直瀉,一度跌穿24200點,高低位喺15分鐘內行晒。上證上半場報收3547點,跌逾2%回落至上月股災低位附近,之前預咗阿爺要力保3600點,即管睇睇下半場國家隊會唔會入場護盤。

阿Man預咗個市冇運行,除咗內地經濟數據唔掂檔,或要等阿爺再出招刺激經濟之外,今日歐洲佬瞓醒又要面對停市已久嘅希臘股市重開,就算希債危機暫時解決,當地股市停咗咁耐,點都有一定沽壓,問題係質咗落去低位有冇承接,總之是福就不是禍,是禍亦躱不過。希臘股市重開已為全球股市蒙上不明朗因素,而大笨象(00005)業績,就怕係有驚無喜。

二三線股仔最吸晴係今日復牌嘅馬斯葛(00136),停牌前冇貨復牌追貨又係捉蟲,開市頭15分鐘炒鬼炒出炒入好興奮,但15分鐘後情況急轉直下,股價跌穿0.6元後直落,之後再冇見過股價重上0.55元之上。

八月首個交易日又係死死吓,睇嚟阿Man個陽光海灘之旅真係預得太過短,暑假放咗一半唔夠,仲有成個八月份要捱,唔通呢個月餘下時間阿Man又要睇劇渡日?!

麥狄文

回上

信報簡介 | 服務條款 | 私隱條款 | 免責聲明 | 廣告查詢 | 信報會議中心租賃 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads