熱門:

2015年7月22日 即巿股評 港股直擊

【盤房來料】賤物鬥窮人 好股無人吼

中港兩地股市仍以上落市為主,即係阿Man所預計,恒指會喺24000至25500點之間上落,既然噚日上到25500點,又唔係有乜利好消息支持,加上欠缺成交配合,自自然然掉頭向下。恒指跌近300點,落番25300點之下,企得住二萬五點已算唔錯,仲有一個禮拜期指結算,睇嚟個市唔會有乜突破。上證喺4000點水平拉鋸,成交同樣縮晒水,無資金入場支持,又係悶局一個。

重磅股唔精神,輪到細價股有番啲鑊氣,今日最多炒鬼參與係必美宜(00379),上半場升逾兩成,一度升穿0.25元轉角位,去到嗰啲敏感位唔見炒鬼高追,講到尾呢啲市,有幾個巴仙進帳已滿足,唔會太進取繼續搶攻。噚日阿Man講過唔少炒鬼因為種種原因日日爛炒,要數炒鬼最like嘅即日鮮對象,中建置地(00261)肯定榜上有名。今日半場成交超過1.7億,成交股數更高達58億股,全因其股價夠晒細粒,升一兩格已講緊有5%以上利潤,一手掃番十幾廿球,計落條數都幾和味。不過炒鬼炒呢類股仔,一兩格升當然和味,同樣插一兩格亦輸得甘。

其實睇番港股現價估值確係平,可惜冇錢入場再平亦升唔起,所謂賤物鬥窮人,依家唔少有基本因素嘅好股無人問津,反而唔少妖股卻有短炒資金入場。炒鬼為好有啖飯食,只集中搞啲細價股仔,老實講必美宜同中建置地呢類股仔,純粹一班炒鬼你推我湧,炒上完全無理由,一旦散水隨時無影。好似噚日炒到慶合合嘅中國金海(00139),噚日下半場再升全日埋單升五成,但今日一開就向下炒,上半場跌14.8%,諗住擺過夜又係貪字得個貧。

麥狄文

 

回上

信報簡介 | 服務條款 | 私隱條款 | 免責聲明 | 廣告查詢 | 信報會議中心租賃 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads