熱門:

2015年7月20日 即巿股評 港股直擊

【盤房來料】盲目亂炒等同賭博

港股今早嘅市況同天氣一樣咁閹閹悶悶,天氣預測話嚟緊呢個星期香港天氣都係天陰有雨,阿Man就喺內地暴發股災後,已預測到港股喺一頭半個月內都係靜靜局局,無啖好食。盤房又係靜到烏蠅飛過都聽得到,最慘係office裡頭搵隻烏蠅飛過都難,一個二個沒精打彩,阿Man決定下半場返屋企休息。

今朝內地股市一度上升,上證指數曾升穿4000點,可惜阿爺暴力救市有指引,唔畀喺4500點樓上沽貨,變相話畀大家知,政策市底下,上證4500點係個頂,仲邊個咁笨4000點樓上追貨,結果上半場收市前,上證倒跌17點,報收3940點。阿Man之前不幸言中,上證4000點變成阻力位,下面3600點就係阿爺護盤水平,上下波幅最多10%,配合晒內地股市上落一成嘅停板機制。

至於港股呢邊恒指同樣係25500點行人止步,恒指見過呢個水平又落番去,只係靠幾件重量級例如QQ(00700)同中國移動(00941)頂住個指數,其他股份表現認真麻麻。二三線股同股仔更加乏善可陳,炒鬼玩嚟玩去又係中國天然氣(00931),雖然又被沽空機構狙擊,但公司迅速復牌,老闆又出嚟解畫,兼且大膽挑戰沽空機構,話要當面對質,有老闆硬撐,股價今早逆市升7.4%,成交亦有番咁上下,皆因有炒鬼捧場。阿Man繼續坐定定喺度,乜度唔使做,反正呢種市況贏面唔高,盲目亂炒形同賭博,唔係一個專業炒家應該做嘅事。

麥狄文

回上

信報簡介 | 服務條款 | 私隱條款 | 免責聲明 | 廣告查詢 | 信報會議中心租賃 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads