熱門:

2015年7月17日 即巿股評 港股直擊

【盤房來料】成交縮水 炒鬼頭痕無股炒

中港兩地股市均見上升,恒指重上25400水平升1%,國指升1.1%逼近11900點,不過成交進一步縮水至上半場不足500億元。上證喺期結日升1.5%,上半場報收3880點。內地股市呢幾日指數無疑係回升,但每日跌停板股份閒閒地過千隻,擺明阿爺只係保大唔保細,亦再證明停板機制停影響流通量,導致股價跌唔停。

香港呢邊好睇唔好食,雖然指數升逾1%,而上升股份亦錄得過千隻,但成交愈玩愈縮,好明顯無缸邊友入場,炒鬼亦無啖好食。阿Man噚日講過上海棟華(01103)破頂上升,買盤強勁,股價堅挺,睇款好快見1元,誰知噚日下後已接近達標,今朝高位0.99元,即係噚日午後上車,今朝見貼近目標價1元應該醒水落車,利潤大概10%,喺呢啲市況算係唔錯。

今日阿Man無推介,一來下半場上證期結唔知會搞乜花臣,二來周末效應成交縮水,唔玩亦冇蝕底。不過唔係個個好似阿Man咁忍得手,唔少炒鬼參與炒作今日復牌嘅中國天然氣(00931),停牌前又畀沽空機構狙擊,老闆Billy簡出嚟解畫兼爭取盡快復牌,結果股價跌唔夠兩成尚算溫和,至少肯投降認輸都有得走。睇番停咗牌接近兩個月嘅漢能(00566),早兩日直頭畀證監叫停,家陣公司話要告證監咁話,一旦呢單嘢進入司法程序,真係有排搞,肯定復牌遙遙無期。若然有貨坐住都打定輸算數預咗撇帳。最慘係已沽空嘅醒目玩家,等復牌大屠殺補貨亦可能無望,一場歡喜一場空。口痕友話唔明證監點解唔畀漢能復牌,無論坐貨預咗輸,又或者沽空要補貨想贏幾多,都要公司恢復買賣先有得搞,家陣一直停牌無數圍,無論邊個參與其中都係輸家。

麥狄文

回上

信報簡介 | 服務條款 | 私隱條款 | 免責聲明 | 廣告查詢 | 信報會議中心租賃 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads