熱門:

2015年7月16日 即巿股評 港股直擊

【盤房來料】公司承諾回購 泓淋唔怕坐定定

無論內地抑或本地股市表現同樣反覆,開市因為上證跌近百點,恒指亦曾低見24800水平,不過如阿Man早兩日所講,阿爺似乎要力守上證3600點,一跌穿3700即見掉頭回升,港股亦成功收復二萬五失地。至於今早唔少低開股份,當大市跌定回升後,均見止跌回升,上半場上升股份超過900隻,只係成交額確愈玩愈縮,港股呢邊半日成交額不過500幾億唔算多。

噚日阿Man話優衣庫北京三里屯情慾短片網上瘋傳,等於幫迅銷(06288)免費賣廣告,豈料呢單新聞愈搞愈大,仲被人懷疑係迅銷自製宣傳橋段,聽聞有關方面已展開調查,皆因一經證實同迅銷有關,即相關片段可被視為宣傳廣告一種,而不雅廣告喺內地要惹上官非,但目前未有證據顯示呢段視頻同迅銷有關。一段三級視頻不單令優衣庫尋日成為網上搜尋器最火熱一詞,案發地點三里屯店更吸引遊人往留影,可見微信、微博等社交網絡威力有幾大。換句話講QQ(00700)確係每次大跌市都可以抄底嘅股份,聰明嘅你下次再遇到「708」咁嘅情況自然識點做。

喺內地股災愈演愈烈之際,阿Man提過上海棟華(01103)肯定有後着,否則股價唔會咁堅挺,公司今日果然有通告,話要大搞農業金融服務,向相關項目放貸,實行開多瓣業務。雖然故事同當初八卦公所講有強頭入股有出入,但股價照升可也,今早再創52周高,已突破股災之高位,彷彿股災從未喺棟華身上留有任何痕跡。從今日通告睇,棟華要拓展新業務,大有機會透過批股集資,股價定必炒高,加上已升穿頂,有面又係無障礙通道,股價要見1元唔出奇,問題係炒高後捱唔捱得到10月底發放紅股,否則股東又係蛋家雞,見水飲不得。

至於阿Man叫大家坐穩嘅泓淋科技(01087)同樣發通告,指公司將動用最多2億,由依家開始至未來一年內進行回購,呢個消息當然對股價有提振作用。公司經過一年有多資產剝離,家陣公司剩餘現金同吉殼一隻,但竟然又會大嗱嗱用兩億元進行回購,唯一解釋係要盡收街貨,部署賣殼。以公司接近30億市值計,乜手會買咁重磅一隻殼,除非買家係超級大袋,所以注入項目亦非等閒之輩,可能動軋要以百億計,阿Man相信泓淋定有震撼消息跟尾,既然「708」當日早上股價低見1.5元樓下都捱得過,不消一星期股價竟能重返4元之上,阿Man當然咬住唔放,一於坐穩等消息。

麥狄文

回上

信報簡介 | 服務條款 | 私隱條款 | 免責聲明 | 廣告查詢 | 信報會議中心租賃 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads