熱門:

2015年7月15日 即巿股評 港股直擊

【盤房來料】情慾片段瘋傳 網民笑稱幫迅銷宣傳

希臘債務危機略為舒緩,歐美股市做番好些少,不過一如阿Man所料,反彈浪已見頂,即使中國GDP能保7,上證仍要跌逾2%。港股亦顯得乏力,現貨二萬五爭持,期貨低水已失守此關。經過上星期大上大落後,完成反彈預期成交開始縮水,上半場成交額不足600億元,估計未來一段時間都係靜英英,阿Man又係時候搵劇煲。

新股金嗓子(06896)終打破近日新股登場即潛水嘅厄運,現價較4.6元招股價錄得不夠5%升幅,不過上半場成交唔算活躍,炒鬼冇興趣參與,守住招股價已算有交代。二三線股仔亦唔見得有幾可取,炒鬼對數字王國(00547)同新確科技(01063)死心不息,積極入場炒,兩股均見逆市上升。阿Man早講過呢兩隻股之前炒到蚊蚊聲,又話目標三五七蚊,但只要肯計一計條數,根本好難維持咁高市值,爆煲暴跌係遲早問題,結果有目共睹,即使現水平較「708」股災低位大幅反彈,但較高位仍然唔見七成有多,好明顯係莊家已成功派貨,可以列入一街蟹貨內傷股類別。炒鬼要day trade炒幾格阿Man梗冇意見,家陣係塘水滾塘魚,玩嚟都嘥精神。

今日個市悶到咁,但盤房又唔係靜英英,皆因整個上午無論微信定whatsapp都瘋傳緊一條『十八禁』情慾片段,一對男女竟然喺時裝店更衣室內翻雲覆雨,而片中案發地點同上市公司迅銷(06288)有關,正正係公司所持UNIQLO優衣庫北京三里屯分店更衣室。網上更唔少網民對呢條片作出回應,最搞笑係有網民開玩笑話淘寶網同京東商城輸蝕比UNIQLO就係不設更衣室,呢條片廣傳等於同UNIQLO免費賣廣告,難怪今日股價逆市上升粒神,上半場報收35.2元。

麥狄文

回上

信報簡介 | 服務條款 | 私隱條款 | 免責聲明 | 廣告查詢 | 信報會議中心租賃 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads