熱門:

2015年6月17日 即巿股評

【盤房來料】丁蟹性格炒股不如及早離場

今日係立法會審議政改方案嘅大日子,上半場港股竟未有隨亞太區其他股市下跌,亦完全漠視上證指數再跌1%,一枝獨秀升近百點,不過成交額繼續縮水,唔排除只係急跌後技術反彈。恒指已確認出現雙頂,暫時即使唔再插深啲,短期亦難大有作為。

二三線股仔炒作未見熾熱,雖然升幅榜頭幾位股份升幅顯著,但觀乎成交未見缸邊友熱烈參與,股仔只係零星炒作,要回復四五月份嘅美好時光,暫時可能性唔大。反正阿Man今日冇乜心水推介,正好解答一吓讀者提問。有讀者問及阿Man喺4月20日推介過中國天然氣(00931),叫大家要買定貨等注資,究竟有乜嘢相關注資資料可以提供。阿Man估計,中國天然氣遲早注資,係基於公司喺舊年先後簽訂十幾份天然氣項目諒解備忘錄,而公司總要落實部份項目。相關資訊完全公開,大家可以喺交易所網頁搵到所有資料。阿Man估計係有人發難渣,見過高位冇食糊,又冇定止賺持貨至今倒輸唔忿氣。

睇番當日推介時股價不過1.7元左右,阿Man預期注資落實後,股價有機會炒上3元。自阿Man推介之後五個交易日,中國天然氣股價最高升至2.43元,其後股價回落至2.2元徘徊咗三四個交易日,之後股價於2元至2.2元間上落,直至5月28日股價跌穿2元後就反覆向下尋底,至近日喺1.5元水平喘定。呢位讀者嘈嘈閉話阿Man害死佢,試問推介後持續五個交易日輾轉上升至2.4元,即係一個星期急升四成,有跟上車理應賺到笑,如盲目等待3元目標價,呢個係閣下問題。當其股價連續幾日唔再向上,係咪要先考慮先沽出套利,就算落到2元先識醒覺跳車,亦有17%盈利。有糊唔食,罪大惡極,轉勢回頭又唔識止賺,仲要怪罪他人,似乎於理不合。最離譜係話阿Man夾埋莊家散貨,阿Man只係用常識去選股炒股,再根據個別股份異動而推測有可能發生嘅事,又何來夾埋莊家。好似當日阿Man估計趙薇以1.6元入股阿里影業(01060),炒高一個開方為強國人作風,結果自阿Man喺1.7元水平推介阿里影業後,其走勢有目共睹。如果話阿Man夾埋莊家,呢次豈不夾埋莊家派錢!

有fans戥阿Man唔抵,話竟然有讀者咁「丁蟹」,即係永遠人哋錯晒,佢自己啱晒,阿Man一啲都唔介意,反正投資領域裡頭從來係二八遊戲,即係兩成醒目資金,贏八成笨蛋資金,若然有人輸錢唔識檢討過失,硬要將責任推落其他人身上,就永遠係嗰八成俾人當點心嘅笨蛋。況且阿Man經常有提醒大家,邊類股仔風險高,炒股仔最緊要轉身快,一見唔對路第一時間跳車,甚至講到明自問唔夠眼明手快,膽少者慎入。俾晒提示又不自量力,以為跟住個「冧巴」買股可以發達,阿Man奉勸一句「及早離場」!

麥狄文

回上

信報簡介 | 服務條款 | 私隱條款 | 免責聲明 | 廣告查詢 | 信報會議中心租賃 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads