熱門:

2015年6月15日 即巿股評

【盤房來料】市況未明朗寧願按兵不動

希望愈大,失望愈大,上個星期五大部份缸邊友都期待周末期間內地有利好消息公布,有個講法係阿爺加大馬力放水,將會再降準或減息,另一個版本就話將會宣布有關「深港通」落實日期及交易細則,結果港股同內地股市齊齊挾高。唔少缸邊友興高彩烈追貨.......結果周末期間冇任何消息公布,再要加上希臘同歐央行談判破裂,拖累各地股市插水,港股喺雙重打擊下,當然難逃一跌。上半場恒指跌逾三百點,二萬七關得而復失,國指跌幅更大超過2%,又超過一千隻股票下跌,幸而成交額只有六百幾億,沽壓唔算好嚴重。

有份喺上星期五高追嘅炒鬼損手,今朝除咗打靶已無乜好做,至於好似阿Man呢一類對上周五傳聞無動於衷嘅「膽小鬼」,即使逃過一劫唔使輸,亦唔見得有乜着數。由於市況實在太唔明朗,尤其今個禮拜有唔少事將左右大市,包括星期三政改方案立法會表決日,緊接到美國議息,呢個時候入市值博率唔高,阿Man寧願忍手。除非有估值偏低嘅優質股,否則阿Man一於少理。

就連Value Partner呢個金手指基金,過往一直點石成金,上星期披露增持京西(02339)就帶動股價升近兩成,可惜一日貨仔就打回原形咁滯。至於已見CCB入股咗嘅靄華押業(01319)同樣披露VP接咗貨,早段股價一度重返2.5元之上,可惜市況實在欠佳,股價要倒跌兩個位,動搖咗VP金手指地位。不過靄華得兩個大孖沙坐陣,每次回吐反而係吸納好機會,阿Man等股價重返10日線,即2.32元水平考慮上車,長線投資目標4元,即係以CCB同VP接批股每股2.03元升近一倍計算。

麥狄文

回上

信報簡介 | 服務條款 | 私隱條款 | 免責聲明 | 廣告查詢 | 信報會議中心租賃 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads