熱門:

2015年6月10日 即巿股評 港股直擊

【盤房來料】散水股博反彈得不償失

MSCI已決定暫時唔將A股納入新興市場指數之內,阿Man一啲都唔覺得意外,皆因A股市場至今仍未對國際全面開放,班鬼子佬無貨喺手,又點會自掘墳墓。上證指數未有受呢個負面消息而太大影響,只係微跌22點。港股則重上二萬七,老實講家陣都係危危乎,尤其家陣講緊政改方案通過機會大減,唔排除淡友又用呢個藉口做瓜個市。畢竟大市由四月二萬五附近起步升至高二萬八樓上,未見有一個較為大型調整,一旦要回補上升裂口,恒指有機會下試26250點。

重磅股固然捱沽,二三線股仔亦唔見得好過,炒鬼可以話無股可炒。不過阿Man寧願煲劇亦唔會亂咁博,好似噚日開始插水嘅新確科技(01063),擺明又係散水格局,今日再跌逾三成,炒鬼博反彈得不償失。查實此股升上1元之後,又係唱到周街知,乜乜物物目標價3元,當時阿Man計過條數俾大家睇,若然炒上3元市值要見500億,阿Man早已質疑新確何得何能。由於新確由高位1.5元水平跌至八粒神已唔見一半,唔少炒鬼錯覺以為好平而博反彈,結果今日再跌阿Man未覺意外。唔明點解啲人咁奇怪,高位跌一半總覺好抵買,但又唔諗諗低位兩粒神起步,八粒神仍然升咗四倍。好似數字王國(00547)已有前科,見過3元又以為1.5元跌咗一半以為好抵買,仲要有人放風係大型震倉未玩完,當時阿Man就呼籲大家咪信以為真,結果再跌到八粒神先識得停,若然再博新確等於重覆犯錯。

連續呢兩個星期咁多炒股先後爆煲,唔少炒鬼元氣大傷,加上整體氣氛麻麻,阿Man建議抖一抖,幸而喺五月底阿Man一直提醒大家減磅。阿Man愛股之一坪山茶業(00364)噚日力保20日線,今朝早段再試該支持區,結果證明嗰個位大把買盤掃貨,重上一粒神之上,決定持有,始終其股價較NAV嚴重折讓,市值十幾億唔過份,公司又坐擁大量現金,阿Man有信心當市況轉好坪山必重拾升軌。

麥狄文

回上

信報簡介 | 服務條款 | 私隱條款 | 免責聲明 | 廣告查詢 | 信報會議中心租賃 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads