熱門:

2015年6月5日 即巿股評

【盤房來料】世達科技新股東陣容強勁

內地股市早段上升,上證指數曾突破5000點,可惜一到價就掉頭回落,上半場上證仲要倒幾點。本地股市跟唔到內地股市升,人哋一掉頭,我哋變本加厲插得更狠,恒指險守27300水平,國指跌幅更超過1.8%。

內地個別券商停止創板股份融資,強國莊家唔夠錢轉,拖累本地魚缸打晒柴。重磅股固然要跟大市跌,股仔亦死死吓幾乎全線陣亡。要數最離譜係君陽太陽能(00397),威一日衰足一個星期,周二抽升逾兩成後,連續三個交易日下跌兼打回原形,仲要失守10日及20日平均線,暫時險守50日線,成幅圖表走晒樣,認真唔多掂。口痕友話呢啲就係本地莊家同強國莊家嘅分別,強國莊家面子大過天,講咗目標價話到就到,永遠有多冇少,同本地莊家目標價要打個折扣剛剛相反。

之前阿Man提過天馬影視(01326)有機泊上大碼頭要儲貨,公司翌日即發通告否認,兼且喺成交疏落情況下,股價更一度隊低至3元邊。不過事實擺在眼前,其股價見3元即有大量買盤密密接,結果又拾級而上,今日更加逆市勁升逾兩成,話冇好消息跟尾點會咁款。

停牌超過一個月嘅世達科技(01282)股權易手復牌,引入新股東陣容強勁,三名主要新股東控股逾七成,包括前海人壽,復牌股價升逾四成。雖然今日股價急升市值已達幾十億,但公司一下子多咗幾十億資金,日後必定大展拳腳,難怪今日吸引咁多缸邊友入場。今朝A.O.盤1.65元做咗5球幾,上半場成交亦以呢個價最多成交,上半場收市前落番1.45元,唔排除下半場有機重上A.O.價。畢竟世達停牌前未見熱炒,有投資者高出停牌前六成幾A.O.入市並非傻仔,公司易手後必有後着。

阿Man講到明數字王國(00547)散貨格局,今日再捱沽係正常,千億市值談何容易,10元目標價喎.....擺明吹水唔抹嘴。尋日復牌大升嘅中國置業(00736)不約而同又話要炒上10元,公司加陣40億股,加埋之前易主發行多90億股共130億股,炒上10元又係過千億市值.......都係嗰句,「耳聽未為真,眼看方為實」,又即管睇吓呢個千億故事如何發展,阿Man就絕對唔會參與,買定花生等睇戲。

麥狄文

回上

信報簡介 | 服務條款 | 私隱條款 | 免責聲明 | 廣告查詢 | 信報會議中心租賃 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads