熱門:

2015年5月29日 即巿股評 港股直擊

【盤房來料】屠殺過後炒鬼保守冇嘢玩

經過噚日大屠殺,今日個市叫定番啲,不過周末前夕唔好抱咁大期望,家上今日都係靜英英,睇款下半場唔會有乜驚喜。噚日咁樣玩大驚嚇,今日炒鬼都保守好多,雖然個別股仔仍有炒作,但跟早兩熾熱氣氛已不可同日而語。

坪山茶業(00364)喺仙與唔仙之間徘徊,即使依然球來球往,但成交縮晒水,睇嚟要猜番兩三日波先有着落。不過早兩日爆升時成交超大,呢兩日回調成交縮水,相信係抖一抖氣,跟住必有後着,反正睇過晒佢啲料,阿Man認為一粒神附近持貨尚算安全。寶威(00024)突然發難炒高兩成四,成交亦似樣,差些少上破四月初高位,可以留意。久融控股(02358)破頂升22%,呢啲走勢一般追得過,不過阿Man記得久融個睇場屬於難以對付之流,高追分分鐘又係再坐一會。另有八卦公提供動感集團(01096),明明話下個月開車,誰知今日已偷步升17%,阿Man問番八卦公係咪用期指結算計下月,咁即係今日開車啱啱好。上半場高位見過0.93元,升破50日及100日線,技術走勢唔錯,大有條件上番1.2元至1.3元。

日圓跌到一仆一碌,帶動東瀛遊(06882)同專業旅運(01235)上升,但交投疏落有得睇冇得食,純粹得個睇字。三月份發過盈喜預告將多賺八成嘅靄華押業(01319)中午派咗成績表,又有驚喜畀股東,盈利較去年同期多賺九成有突,只可惜此股交投唔算活躍,並唔係炒作對象,但有閒錢長線投資,靄華係坐得過嘅靚貨。

麥狄文

回上

信報簡介 | 服務條款 | 私隱條款 | 免責聲明 | 廣告查詢 | 信報會議中心租賃 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads