熱門:

2015年5月28日 即巿股評 港股直擊

【盤房來料】大市仆直無礙股仔喪炒

內地股市連升七日後回吐,港股跟唔足升幅,但一插水就相當落力,跌幅跟進不特止,仲要有過之而無不及,恒指跌1.4%,國指跌夠2%俾你睇。期指結算日咁跌法,樂觀嘅缸邊友話結算低位下個月仲有得炒,阿Man唔知咁算唔算自欺欺人。

一如阿Man預期,五月份大市就喺上上落落中過去,反而股仔鑊剷party未有停過,日日都見炒鬼有新寵,日日都有股仔落鑊喪炒,今日炒鬼瞄準雅天妮(00789)同榮暉國際(00990)。碩果僅存嘅仙股中建置地(00261)繼續熱炒,海鷗線(seagull線)話唔單止脫離仙班,目標直指兩粒神,至於乜料要咁炒法,聽聞公司要喺墨西哥搞賭場喎.....老實講中建咪睇佢股價僅得七仙幾,但市值高達48億,有乜本事炒上過百億市值,阿Man實在無言。至於噚日都熱炒嘅坪山茶業(00364)今日炒唔郁,剛脫離仙班目前守住一粒神,又係海鷗線來料話要炒上三粒神,一粒神附近唔怕收集。跟中建比較阿Man認為坪山穩陣些少,至少公司係隻現金牛,每股現金都有六七仙,NAV每股0.226,利用所持現金進行收購注資,以其目前市值僅16.3億,炒上三粒神亦不過50億,現價一粒神極具值博率。

噚日推介國藏(00559)快靚正,下半場買又head住一成過夜,今日再升近9%,既然首個目標係1元,打個折準備八九毫子食糊。位元堂(00897)亦有晒交代,兩粒神首個目標價差不多到位,0.19元樓上落車冇壞。君陽太陽能(00397)供股接近完成,上次推介成功見五粒神順利獲利,八卦公話供完股又要落鑊,股價喺現價徘徊幾日,只要唔跌穿0.32元50日線,開始儲定貨等開車。

麥狄文

回上

信報簡介 | 服務條款 | 私隱條款 | 免責聲明 | 廣告查詢 | 信報會議中心租賃 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads