熱門:

2015年5月20日 即巿股評 港股直擊

【盤房來料】漢能暴跌拖累股仔炒鬼小心

大市持續反覆,恒指雖然跌幅有限,國指更逆市上升,但喺內地股市再升逾1%下,港股竟然無厘神氣,可見港股相對幾咁疲弱。幸而喺近日大市調整期間成交額未見顯著增加,即係沽壓唔算太嚴重。

早兩日無論大市起跌,股仔仍然炒到出煙,今日已無呢支歌仔唱,因為有隻炒股皇爆咗煲。今年初令唔少缸邊友發咗達嘅漢能(00566)暴跌近五成,最離奇係公司咁啱今日開股東會,阿Man八到股東會上冇乜特別事發生,但股價突然暴跌後停牌,唔排除監管機構會盯上。漢能忽然插水後停牌,嚇到唔少缸邊友雞飛狗走,唔少熱炒股到行路打倒褪,明明唔少破位股要再上,但見漢能咁款都縮番轉頭甚至倒跌。觀乎升幅榜內股份,有升幅但成交欠奉,大部係私人派對,只有東方網庫(00430)叫做有炒鬼與吓,但成交額只不過四千萬,完全唔成氣候。

好似阿Man愛股之一幸福控股(00260),眼見要上破0.68元高位,可惜畀漢能咁搞法,又打回原形落番0.64元無起跌。另一隻係今朝有人叫留意嘅京西國際(02339),晨咁早見中信里昂同中銀紮晒馬擺定大晒士買盤,可惜又畀一堆炒鬼沽盤隊冧,上半場仲要跌緊幾個價位。線人來料話好快有注資,睇番呢兩日走勢係似模似樣,但破咗位又唔行,先列入觀察類別。午後留意位元堂(00897),供股完成結果錄得唔夠一倍超額認購,股價升近一成,但見0.126-0.135成交活躍,眾多炒鬼集結,股價又重上多條移動平均線,話唔定可以短炒番轉。

麥狄文

 

回上

信報簡介 | 服務條款 | 私隱條款 | 免責聲明 | 廣告查詢 | 信報會議中心租賃 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads