熱門:

2015年5月18日 即巿股評 港股直擊

【盤房來料】天馬影視傳要搭上超級巨頭

一個誤傳消息,上周五下半場大挾淡倉,一個澄清報導,今日上半場又隊番二百點,暫時恒指險守27600點水平,未擺脫五月份上落市格局。雖然重磅股普遍回軟,但股仔各自各精彩,今個月炒股唔炒市策略不變,一樣大把機會搵食。

時富金融(00510)選擇逃婚,股價未至打回原形,但難逃一跌插水15%算係跌得少,阿媽時富投資(01049)亦跌逾一成,樂觀一派認為時富係吊高嚟賣,本地券商有價有市,阿Man當然唔敢駁嘴,只有靜觀其變。復牌股只有時富孖寶水,其他復牌股如中國9號健康(00419)爆升七成幾,天馬影視(01326)升4.1%相對溫和,路邊社消息話此股要倍升,皆因國策支持發展文化產業,仲準備搭上超級巨頭,阿里巴巴擁有阿里影業(01060),天馬要搭上邊個巨頭呼之欲出,若然真係搭上此巨頭,以其目前廿億不足市值,股價何止可以翻一番。

支付寶股份仍然受捧,炒鬼當然最愛創新支付(08083),阿Man早於三四月份已作推介,當時講過1元係首站目標,終極目標2元,要睇閣下有冇耐性坐貨。另一支付寶股中國支付通(08325)沒有最高,只有更高,街貨盡入強中手,又係姿勢隨佢擺。阿Man愛股之一幸福控股(00260)又再振作起嚟,上半場升逾8%,上半場成交仍較上周五有所增加,睇嚟就要升穿頂上破0.68元,有貨坐穩等升空之旅。

有人問阿Man有冇聽過中信資源(01205),此股月初發圍炒上,嚟到兩皮行人止步,留意一吓公司旗下一個於印尼有塊油田,袋鼠國公司Lion Energy亦擁有此油田5%股權,人家公布呢個項目喺勘探期間有重大發現,中信資源係呢個項目大股東,竟然隻字不提冇發通告,究竟乜嘢葫蘆賣乜藥,阿Man完全唔理解,股價今日表現麻麻,不過有此消息,不妨先列入觀察類別。

麥狄文

回上

信報簡介 | 服務條款 | 私隱條款 | 免責聲明 | 廣告查詢 | 信報會議中心租賃 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads