熱門:

2015年5月15日 即巿股評 港股直擊

【盤房來料】股仔繼續炒,炒鬼繼續跑!

港股一向有個性,過往主要掹住美股衫尾行,近呢兩年就受內地股市影響較大,到近排仲有形,邊個大佬都唔跟,自己想點就點。本地以今早內地股市表現如此不濟,港股理應升唔起,偏偏就話之你,恒指又上番27400點。不過自大市見咗二萬八回落,五月份都係冇運行,阿Man晨早已預警,五月大市波動兼要調整,必要減低持貨量,炒股仔轉身要夠快。

尋日啲「互聯網+」股炒到出煙,今日即回氣無晒影,所以有糊唔食,罪大惡極,咪再好似上個月咁大胃口,吓吓要贏五成以上先肯走。炒鬼一向短癮,上個月啲當炒股郁下都升五成甚至一個開,炒鬼幾格走人贏得少過師奶股神。不過風水輪流轉,今個月炒鬼嗰套先行得通,股仔快上快落,幾個%利潤都走人,寧願跑多兩轉密食當三番,否則又係得個坐字。今日開始見個別超落後股份被發掘,亞洲果業(00073)橫行向下多時,今日卒之被炒鬼推落鑊,上半場升兩成走勢突破,第一日大陽燭上升有權再下一城,提醒大家此股業績每況愈下,兼且上面蟹貨甚多,參與炒作嚴守止蝕。

皇朝傢俬(01198)噚日發難後今日再升逾兩成,順利升穿5粒神轉角位,咪以為兩日由0.3元急升至0.5元之上就玩完,家陣皇朝市值不過幾個億,再炒高一個開見1元都不過十幾億市值。但兩日急升未宜高追,等整固回落至0.48元再買亦未遲。保興資本(01141)早前以0.25元批股引入新股東,股價曾升穿五粒神,調整三日今日股價回升,現價較0.25元升咗毫幾子,以新股接批股後股價例牌升一個開計,保興資本至少要上番五粒神。線人來料話新主第一站要睇七八毫子,即係目標市值倍升至50億元唔過份,既然調整完成不妨0.4元附近搭轉順風車。

麥狄文

 

 

回上

信報簡介 | 服務條款 | 私隱條款 | 免責聲明 | 廣告查詢 | 信報會議中心租賃 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads