熱門:

2015年5月13日 即巿股評 港股直擊

【盤房來料】大市古怪又翻炒股仔!

今日上半場個市古靈精怪,裂口高開後指數拾級而下,一度掉頭回落,期指更失守曾失守27300點水平,之後又收復失地重上27400點,之後一直喺現水平徘徊,悶局一場,成交得700幾億靜靜局。

大市無動靜,股仔又起哄,炒鬼最熟悉嘅妖股之一中國金海(00139)聽聞換咗廚房佬,由本地薑換咗強國人,之前由1元樓上插水落番去6粒神,今日一躍而起又落鑊。呢隻嘢講真阿Man好感有限,呢兩年唔少人輸到入肉,又批又合又供股,總之玩到班小股東謝晒,仲要每一手萬四股,衰啲講句炒落去永冇齊頭數,一球掃唔到,以萬四為單位,吓吓要計住條數。靜咗一輪嘅東南國際(00726)升一成,八卦公話快有注資,連續兩日升穿頂,進入無阻力區,睇樣好快變身蚊股。

噚日炒到出煙嘅謝霆鋒漢傳媒(00491)今日抖抖氣,口痕友話霆鋒個名無趙薇咁值錢,但以其目前市值廿億鬆啲,睇嚟接貨班強國廚房佬一定未夠喉,今日回調正好有機會上車。聽聞呢轉目標價1.5元,現價上車仲有四成水位,跌穿1元止蝕有一定值博率。

另外,中國富佑(00572)新主陳懷德就押股單訴訟終於搞掂甩身,股價即升逾一成賀一賀,純睇走勢此股沉寂多時,今日成功收復10日及20日移動平均線,應該係啱啱開車,但上面確係重重蟹貨,過到5粒神先有條件飛天。

麥狄文

回上

信報簡介 | 服務條款 | 私隱條款 | 免責聲明 | 廣告查詢 | 信報會議中心租賃 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads