熱門:

2015年5月12日 即巿股評 港股直擊

【盤房來料】謝霆鋒個名有冇趙薇咁值錢?

阿爺份母親節禮物似乎對港股起唔到作用,尋日高開低走,今日再跌回落27700點水平之下。人地上證指數連彈兩日,港股完全跟唔上,大戶明顯想放過追咗貴貨班大好友。至於二三線股仔因為恩達(01480)事件而收歛炒作,缸邊友埋怨恩達陀衰家,搞到股仔無啖好食。

恩達反咗艇,冧巴先有一字之差嘅新股滴達(01470)就較招股價勁升逾七成,不過開市價1.16元同現價差無幾,盤中最高見1.23元,今日先上車冇肉食,IPO認一手人人有份,睇嚟都順利落車食埋糊。

國美電器(00493)噚日下半場係威係勢,炒高至2.3元高收,可惜今日無以為繼,再一次引證此股有幾難炒,阿Man對付佢嘅策略係待回吐收集,打死唔高追。尋日將北亞資源(00061)列入觀察名單,噚日午後一度高見0.405元,一步之距未能衝破0.41元高位,阿Man唔心急追貨,反而今日股仔調整,此股喺0.38元水平頂得吓,考慮呢個位先上車買定貨底,等破頂再加注,上望目標0.7元。

謝霆鋒隻漢傳媒(00491)炒高批股後竟然死唔去,以每股0.81元批股,雖然股價上月喺六粒神起步,現價幾乎升一個開,但去到家陣市值仍未過廿億,即使多咗兩成新股亦只係廿幾億市值,呢個晒士啱晒落鑊。趙薇嘅阿里影業(01060)可以炒到七百億市值,口痕友講笑話霆鋒個名值十份一都70億市值,即係仲有大把上升空間。阿Man唔敢質疑口痕友嘅大膽假設,只係「趙薇」由強國人做大廚主理,除非今次「謝霆鋒」批股引入強國人做大廚,否則參與炒作都要提高警覺。

麥狄文

回上

信報簡介 | 服務條款 | 私隱條款 | 免責聲明 | 廣告查詢 | 信報會議中心租賃 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads