熱門:

2015年4月30日 即巿股評 港股直擊

【盤房來料】大市回調妖氣沖天!

阿Man預咗個市結算後回吐,果然今日喺內地股市微調情況下,港股自我懲戒殺1%,盤中更一度隊穿二萬八,雖然只係一眨眼已收復二萬八,但足以嚇親唔少缸邊友,幸而成交上半場不足1000億元,反映沽壓唔算嚴重。重磅股一如阿Man所料要料料,缸邊友又轉去玩細價股,升幅榜過半數登榜股屬毫子股,可見大市轉差炒鬼即開股仔鑊剷派對。

每當大市回調,魚缸內又妖氣沖天,藍鼎(00582)炒到出現五成升幅,升穿宣布供股前高位,個勢又好似要大爆炒。合一投資(00913)話係妖股無人有異議,又係炒鬼球來球往之地,不過阿Man只係袖手旁觀,但唔反對人哋參與。阿Man唔嫌長氣講多次,炒呢類股仔見好要收,唔單止唔好過夜,連上下半場過市都可避則避,尤其係藍鼎有前科。集團個幾星期前就係炒到熱爆之時,停牌公布股份十合一兼且一供十,大折讓大比例供股集資,拖累股價一復牌插水四成,雖然經過幾日今朝卒之舊地重遊上番0.15元樓上,但有貨在手呢個幾星期確係畀佢嚇餐死。

尋日推介超落後本地券商股結好控股(00064)算有交代,五毫子樓下大把時間上車,收市高企0.55元,今朝雖然曾隨大市回吐腳仔軟一軟低見0.51元,但買盤強勁又上番上日收市價之上,盤中更高見0.6元。公司發通告指有意分拆證券業務,記得金利豐金融(01031)宣布考慮分拆證券業務之時,股價兩日由1元急升一倍有多高見2.25元,即使結好未必翻版一樣倍升見1元,至少都炒番上NAV上試0.78元,繼續坐穩同佢玩鋪大。英皇證券(00717)除權爆升,君陽太陽能(00397)下周除淨唔知會唔會有樣學樣炒上,值得列入觀察名單睇一睇。

麥狄文

 

回上

信報簡介 | 服務條款 | 私隱條款 | 免責聲明 | 廣告查詢 | 信報會議中心租賃 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads