熱門:

2015年4月29日 即巿股評 港股直擊

【盤房來料】QUAM賣枱帶動本地券商再落鑊

今日期指結算加上內地股市繼續回調,港股放一放軟手腳亦正常,大漲小回阿Man覺得冇乜唔妥。不過結算後或見真章,五月份或者出現較大調整,加埋呢個星期長周末,阿Man建議呢兩日都係減倉套現,多持現金,盡量輕裝上路。

中國國家文化(00745)繼續喪炒,盤中高見0.255元,成交高額竟達11億元,成交股數更超過50億股,喺魚缸轉緊一半發行股數。咁大成交有人認為有排玩,阿Man則認為兩日超級大陽燭都係見好就收,反正呢類股票宜炒不宜坐,持貨好怕瞓唔著。炒鬼炒股仔除咗中國文化,佳訊(00030)、協同通信(01613)等毫子股亦落鑊,話時話魚缸裡頭究竟仲有幾多仙士股?

阿Man真係要向各位粉絲講聲sorry,見QUAM(00952)批完升咗四成幾五成,諗住食一食糊換馬落後時富金融(00510)亦無壞,誰知QUAM可以呢頭以0.75元批股,唔夠一個星期可以賣埋枱,真係估佢唔到。相對時富金融又唔多行,呢吓換馬失咗手勢。QUAM復牌公布民行(01988)每股0.565元認購九成新股入主,更開出1.38元G.O.價,又多一間本地券商染紅。QUAM呢單deal帶動其他本地券商股落鑊,阿Man認為識揀要揀名花未有主嘅本地券商,心水推介係結好控股(00064)。結好完成供股後股價表現一直落後其他本地券商股,原因阿Man喺4月15日嘅「金融街密語」講得好清楚,不過就係有心人如何壓價,缸邊友都會發覺結好係極具賣枱潛質嘅本地券商。更重要一點係結好截至去年三月底止每股NAV為0.788元,即係現價PB0.6倍,係魚缸裡頭唯一PB不足1倍嘅股份。家陣內地券商閒閒地都賣緊兩三倍PB,一旦結好搵到頭好人家,2倍PB出售每股都1.55元,即係現價買潛水升幅300%,阿Man呢鋪決定重搥出擊。

麥狄文

回上

信報簡介 | 服務條款 | 私隱條款 | 免責聲明 | 廣告查詢 | 信報會議中心租賃 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads