本欄近期建議大舉入市唔值博，踏入2020新一年，隔晚美股又狠摑筆者一大巴，美股三大指數再創新高，但眼見標普昨日收3257點，遠高過200天鬼佬牛熊線2969點8.8%，更是五年內第二高，實在買唔落手。
當然唔喺睇淡後市，整體上大市方向仍往上升，因為全球央行放水，只喺拋離200天線太遠，一有偏淡消息便可掟得七彩，更何況今早美伊事件大家要十分留意，因為今早美軍用無人機於伊拉克殺害伊朗將領，令港股由升逾三百變跌一嚿，道指期貨更插近三百。
伊朗會否封霍爾木茲海峽是關鍵
先講美伊最近衝突的背景，上周伊拉克什葉派民兵組織，發射火箭殺害一名美國軍事基地承包商，更衝擊美國大使館，故此美國今早作出報復，美軍以無人機炸死幕後撐腰伊朗軍方第二號人物蘇萊曼尼(Qassem Soleimani)將軍。
有傳媒指，蘇萊曼尼將軍是伊朗國家重量級人物，負責伊朗國外(包括敘利亞、也門、伊拉克及黎巴嫩)軍事行動，更曾是伊朗保守派在2012及2016推舉參加總統大選，但卻被他拒絕。今次事件，加拿大皇家銀行商品分析員認為，會將美伊由影子或代理人戰爭，走向真正爆發戰爭邊緣。
筆者認為，事件發展要注意伊朗會唔會切斷有「石油動脈」之稱的霍爾木茲海峽，該航道佔全球兩成的石油出口，是沙特阿拉伯、伊朗、阿聯酋、科威特、伊拉克等主要產油國重要航道，一旦伊朗封鎖該航道，油價金價便會井噴上升，足以踩冧股市。
比亞迪電子傳打入蘋果產業鏈
今日另一單大新聞是關於科技股，有「最強蘋果分析員」之稱的天風國際分析師郭明錤，點名比亞迪電子(00285)有望打入蘋果產業鏈，消息令比亞迪電子爆升10.6%。從媒體報道，郭明錤認為，比亞迪電子有望取代台灣的廣達，成為iPod Touch獨家組裝供應商，同時有機會奪得10至20%以上iPad組裝訂單。
大家都知，iPod Touch喺現時蘋果產品中最雞肋部分，若按郭明錤預計，未來iPod Touch仍會在蘋果產品中存在，問題是蘋果無理由唔知iPod Touch是雞肋產品，為何突然會改由比亞迪電子組裝。筆者聯想，蘋果揾比亞迪幫手未止只喺手機咁簡單，或是合作搞汽車。
蘋果公司有個公開的秘密，就是計劃進軍汽車市場，郭明錤更料最快2023會推蘋果汽車(Apple Car)，蘋果進軍汽車業，之前傳過唔喺整一架車，而是發展自動駕駛汽車技術，該計劃叫Project Titan。
話到明是自動駕駛汽車技術，當然要揾間車廠合作，無理由揾死對頭Tesla合作，而電動車揾上比亞迪亦對路，一來比亞迪是電動車龍頭之一，二來大家都喺股神系(即巴菲特持股)，即喺同聲同氣。
另一方面，汽車愈來愈走向「形」格化，以Tesla為例，車內必定有形到爆的LCD大芒，試想想，一架比亞迪電動車，配上蘋果的iPod Touch及蘋果獨有自動駕駛汽車技術，再貼埋蘋果品牌便可升價十倍，從企業角度諗，蘋果只需關注自動駕駛汽車技術，不用煩汽車硬件，反之比亞迪亦一樣，可謂一石二鳥。
當然，上述只喺筆者之聯想，以上概念可能要到2023年才能夠實現，更何況內地降新能源車補貼，相信比亞迪仍會在36.2至45元上落為主，博以上概念可留待跌到36.2元左右，當然唔會買一手咁大注(一手500股，折合1.96萬元)，可考慮透過美股ADR買數股比亞迪，其上市編號為BYDDY，一股昨晚收市計10.09美元，折算78.48港元，買多與少就悉隨尊便，但緊記唔好咁大注。
編按:作者尹德政(Ricky)，醉心投資美股近十載，最大滿足感來自尋找抵買有實力的世界行業領袖，每逢周三、五在「信報網站」及「港股360」撰文，另每逢周二在《信報》撰寫「政觀其辯」。
