熱門:

2019年8月23日 國際財經 即巿股評

【環宇搜股】舒特拉的名單(MSCI香港版)

花旗國總統特朗普貪口爽,以振興美國經濟為由,本周初晚突然爆句「研究減稅可能性」,點知唔夠一日就自打咀巴,反口講無意削減資本增值稅,因只會惠及富裕家庭,貫徹「真的假不了,假到不得了」作風!

唔計業績股,港美股市整體偏悶,因大家等緊全球央行年會Jackson Hole講乜,焦點是聯儲局主席鮑威爾周五在當地時間早上十點的演講,因為是白鴿局自上個月啟動十年來首次減息,佢老哥首次發表講話,若果言論大放白鴿,全球股市就繼續開P,一旦扮鷹兼阿支阿左,全球股市即急跌,呢張單特朗普睇怕一定要揾鮑威爾去賣。

今年大灰熊上身的大摩,警告全球經濟衰退風險高,因為製造業疲弱開始蔓延,料三個季度內全球經濟增速低過2.5%,更批死香港,估樓價會跌一成外,順手將MSCI香港評級降至「減持」。

MSCI香港地產股為主

阿茂與阿秀都知恒生指數喺乜東東,即50隻主要股份按比例多少炒埋一碟,講到MSCI香港裡面有咩成份股,十個散戶九個半都矇查查。

查實又好難怪,MSCI真係一個神秘組織,以前捐窿捐罅先知果呢份名單,但現今是被動基金發圍年代,美國設計唔少ETF吸引大戶散戶落叠,當然包括MSCI香港指數,故此大家可隔山打牛,揾到呢份傳說中的名單。

美國有隻ETF叫EWH,喺追蹤MSCI香港指數,從網頁曲線方法得悉,唔計持有期指及現金等,MSCI香港揸住46隻股票,頭20隻最大持股佔整個倉持股比例達80.77%,當中友邦(01299)最高,比例高達23.3%,第二及第三位是港交所(00388)及領展(00823),持股比例分別為7.52%和4.95%。

持股比例由第四至十位分別有長和(00001)、新地(00016)、煤氣(00003)、長實(01113)、恒生銀行(00011)及銀河娛樂(00027),持股比例分別為4.79%、4.62%、4.1%、3.56%、3.37%、3.26%及2.68%。

至於第十一至廿位股份包括有中銀香港(02388)、怡和、金沙(01928)、創科(00669)、電能(00006)、港鐵(00066)、萬洲(00288)、新世界(00017)、九倉置業(01997)及恒地(00012),持股分別為2.53%、2.3%、2.2%、1.9%、1.88%、1.87%、1.58%、1.55%、1.41%及1.4%。

若果細緻睇下廿大持股,所謂MSCI香港指數,其實咪又喺地產股指數,雖然成份股有恒生及中銀呢類銀行股,但銀行是跟地產商揾食,另外港鐵都已經大半是依靠賣樓及租金維生,所以按現時社會運動情況發展,樓價及租金下跌影響下,唔駛大摩講,大家都知要減持地產股啦!

ETF焗掟友邦創科香港電訊

大摩嗌減持MSCI香港,驚青投資者唔多唔少會減持,上述46隻股票睇怕都要捱沽,但正所謂淡定有錢剩,MSCI香港唔係每隻都喺地產股,例如持股最大的友邦,睇美國經濟揾食的創科,還有佔比排第23的香港電訊(06823),以及早前估值炒到堅離地的維他奶(00345),可趁基金純技術掟貨藥石亂投下,拯救呢批舒特拉的名單。

(註:MSCI香港參考以下連結https://www.ishares.com/us/products/239657/ishares-msci-hong-kong-etf)

編按:作者尹德政(Ricky),醉心投資美股近十載,最大滿足感來自尋找抵買有實力的世界行業領袖,每逢周三、五在「信報網站」及「港股360」撰文,另每逢周二在《信報》撰寫「政觀其辯」。

[email protected]

 

回上

信報簡介 | 服務條款 | 私隱條款 | 免責聲明 | 廣告查詢 | 信報會議中心租賃 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads