« 返回前頁列印

港股直擊 | 2015-03-04 12:17

【盤房來料】市況麻麻坐定定喺度

放大圖片

兩會揭幕暫未有利好消息,加上噚晚歐美股市腳軟,港股今早跟隨插水,恒指一度跌穿24600點,順手屠殺24588大牛一隻。前輩話但凡兩會舉行期間,港股例跌,開會前開定淡倉,至散會時平倉,幾乎無失手,阿Man未有作統計,不過純睇勢呢期個市都係瓜多過菜。尤其24200-24300點係牛證街貨重貨區,距離現價不過三四百點,斷估大戶冇咁好死留番條『牛命』,唔排除呢兩日見一見24200點順手屠牛。

今日要阿Man推介確係有難度,皆因今早可以話全無方向可言,勉強嚟講醫藥板塊算係逆市走強,好似四環醫藥(00460)、石藥(01093)、華瀚生物(00587)同利君(02005)均見資金流入追捧,但氣勢僅屬一般,即使平均升幅2-4%,阿Man都怕追完貨又再坐一會。好似早兩日炒到慶烚烚嘅新能源股,除咗首富漢能(00566)愈升愈有之外,其他都係高位見腳軟,可見呢期炒鬼短癮非常,兩三個價位都要食糊,否則又係『有食唔食,後悔到極』。加上大市整體走勢麻麻,阿Man寧願坐定定喺度,乜都唔好做。

麥狄文