« 返回前頁列印

港股直擊 | 2015-03-02 12:27

【盤房來料】協鑫孖寶剛爆新升浪

放大圖片

人行喺周末期間再宣布減息,以為阿爺放水港股可以重上二萬五,誰知又係一地眼鏡。恒指高開重越24900點,不過今次連二萬五個影都見唔到就掉頭,十點左右滙豐公布PMI後個市急插,現貨重返24700水平,期指仲誇張低見24600點。之後半粒鐘唔到指數又重返24800點之上,一來一回走勢反覆,玩死期指炒家。至於金管局再收緊樓按,似乎對地產股影響有限,新一輪辣招針對掹車邊上車一族,對二手市場影響大些少,地主佬身家厚,賣新盤可以借多兩三成畀客仔,辣招對大市影響亦有限。

阿Man炒股唔炒市,話之大市忽高忽低,今日最勁係上星期曾停牌發CB0既華人策略(08089),復牌後連續兩日勁升,家陣破晒頂,真係姿勢隨佢擺。記得過年前一星期此股由七粒神起步,家陣升咗一個開有突,有貨當然可以睇住慢慢食,無貨高追真係要無比勇氣。阿Man寧願睇番一對協鑫孖寶,阿媽保利協鑫(03800)升4.8%,阿仔協鑫新能源(00451)升一成,兩股幅圖同樣靚仔,走勢啱啱突破,應該剛開始新一輪升浪。

麥狄文