« 返回前頁列印

即巿股評 | 2022-01-21 13:36

【盤房來料】急升過後呈超買 回吐整固屬正常

放大圖片

美股隔晚先升後回,三大指數以全日低位收市,內地股市亦唔多精神,創業板更創逾8個月低位,連累港股升至兩個月高位後回吐,恒指一度倒跌超過200點。恒指低開54點,一度收復地倒升29點,見24982點近兩個月高位,但喺A股拖累下,港股轉升為跌,半日多跌211點,見24740半日低位,其後跌幅略為收窄。半日恒指報收24766,點186點;國指跌58點,報8703;恒科指半日跌75點,報5820。

美國十年期債息掉頭,今早跌穿1.8厘,大笨象(00005)股價回軟,半日跌2.9%,話咗大笨象要上55有難度,尤其上面蟹貨重重,由四十幾水平累升咗兩三成,回吐抖氣好正常。其他銀行股普遍回軟,不過回吐幅度又唔算好大。至於石油股咗幾日,今日中石油(00857)半日再跌3.3%。重磅科網股噚日急升過後,已呈超買,今日回吐亦唔出奇,ATMXJ只要仍然守住啲支持位,後市仍有機會睇高一線,包括騰訊(00700)望實450;美團(03690)睇住220;阿里(09988)支持位120;京東(09618)就望實280;至於小米(01810)大支持位18;斷估都應該守得住。

內需股今日跑出,啤酒股全線向上,幾隻啤酒股半日升4至5%,餐飲股亦見炒作,不過相對累計跌幅,呢個板塊仍要一段時間養傷,暫時都只係反彈。噚日阿Man喺收費聊天室推介嘅豬肉股萬洲(00288)表現唔錯,半日逆市升咗上去5.2水平之上,走勢持續向好。

中國民用航空局發展計劃司司長韓鈞表示,中國將繼續加大投入力度,加快樞紐機場改擴建,推動機場與各種交通方式深度融合,機場航空股獲追捧。航空相關脠份有資金流入,半日升幅由超過1%至5%不等。此外,國務院印發「十四五」旅遊業規劃,同程旅行(00780)跟攜程(09961)半日分別升5.4%和9.4%。不過今日星期五,唔建議手多追貨,呢個板塊嘅股份升勢通常甚為短癮,都係少做少錯。

手機設備股畀隻瑞聲(02018)拖死晒,瑞聲發盈警都算,管理層對業績來年亦唔睇好,噚日股價跌逾一成後,今早再跌半成,龍頭舜宇(02382)半日跌4%,穿埋210個大支持位,失守250日線,都幾濕滯。其他手設股跌幅由1%至3%不等。港股經過噚日急升後,今日周末前夕,有資金選擇先減磅離場升好正常,阿Man慣性周末前夕一動不如一靜,今日下半場可以提早熄機。

麥狄文
(徐狄怡‧證監會持牌人)