« 返回前頁列印

即巿股評 | 2021-12-08 11:02

【輪證贏家】京東牛過夜隨時收工

放大圖片

噚日恒指尾市真係愈升愈有,最後仲爭少少上到24000點添。至於噚日揀嗰隻京東(09618),繼續等佢五分鐘圖上見Slow STC(14,3)回落去超賣位時上車。終於皇天不負有心人,喺噚日臨收市前嗰20分鐘,見到五分鐘圖上Slow STC(14,3)真係碌得返20以下嘅超賣水平,隻(60015)可以喺呢啲時段落場,以由3點40分至收市前見京東五分鐘圖Slow STC(14,3)落到超賣位而入(60015),期間(60015)高低位做過0.062元/0.06元計,平均買入價為0.061元。不過喺呢啲鐘數入嘅話其實都係預咗過夜。

隔晚美股再升,但見到升幅不及前一晚,雖然隔晚升幅都係強,不過以幅度計都可以叫做波幅細咗(暫時計),唯仍然帶動到港股氣氛。恒指完U之後開市報24090點,終於上得返去24000點樓上,而隻京東平開後,截至依家9點37分,曾經上過310蚊樓上,但喺五分鐘圖見京東條Slow STC(14,3)依家先至上返去中軸水平,貪心鬼又睇下條Slow STC(14,3)可唔可以上得返去超買位,然後走人。

至於恒指方面,今朝喺聊天室暫時未係好進取,事關明知指數現水平咁近熊證街貨,仲要爭嗰少少就可以全殺24000至24099點嘅熊證街貨層,但就偏偏今日指數再高開之後條Slow STC(14,3)搶得太高,唯有博指數喺開市無耐先行高開低走之後,喺五分鐘圖下方嘅天線覓得支持先至再出手。但都辭戰友好快手咁先食隻過夜好倉,再即市出淡倉爬格仔,爬完之後專心工作。

嚟到9點49分,返轉頭再睇隻京東,同指數開局啱啱相反,平開後高走至依家見Slow STC(14,3)喺五分鐘圖上開始進入超買範圍,隻過夜牛(60015)隨時收夠籌又可以收工。

再嚟到9點58分,指數喺五分鐘圖上面見到保歷加通道有收窄嘅情況,而指數都向下穿咗50分鐘線(五分鐘圖10線)而落到100分鐘線(五分鐘圖20線)之上,咁快條保歷加通道口就收窄,唔通指數今日提早收工?

作者阿珊,任財經/投資版傳媒人十幾年,《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證,唔貪心,志在搵餐下午茶。

想入Patreon/聊天室?Click呢度就得:https://www.patreon.com/cbbcwar

FB:https://www.facebook.com/cbbcwar