« 返回前頁列印

即巿股評 | 2020-06-01 13:14

【盤房來料】港交所繼續跑贏大市

放大圖片

上周五侵侵發表講話,雖然對中國所作所為大表不滿,但暫時只係話將會實施制裁,但尚未有任何實際行動。而市場最擔心侵侵嘅可能會做嘅兩個動作,包括取消首階段中美貿易協議,及取消香港特殊貿易地位,暫時都未有實施,市場暫時鬆一口氣。由於美國尚未出招,人民幣離岸價勁彈,加上內地5月財新製造業PMI好過預期,港股趁機勁彈逾七百點,挾爆淡倉。

恒指裂口高開578點,23539點已經係半日低位,其後一舉收復10日(23546點)及50日線(23687點),最多升844點,見半日高位23806點,可惜未能收復埋條20日線,升勢回順。半日恒指報收23702點,升740點;國指則報收9834點,升273點。留意半日成交額已增至924億元,睇嚟沽空挾到high high ,冚倉最緊要快。

藍籌股除咗萬洲(00288)逆市跌之外,其他全線向上,重磅騰訊(00700)跟友邦(01299)分別升4%及5.6%,大笨象(00005)半日升1.4%繼續落後於人。港交所(00388)維持強勢,呢隻係唯一上周阿Man叫吼位喺265元樓下撈嘅藍籌,半日升4.5%,更創283.2元年內新高,睇嚟大行目標價300元唔係講笑,喺中概股排住隊回歸本地魚缸,港交所股價可以持續跑贏大市。

由於人仔勁彈,內房股即跟住上,唔整個板塊升勢顯著,閒閒地升5%以上。醫藥股受中美關係影響較少,上星期雖然B股見腳軟,但其他醫藥股則接力,今日就所有醫藥股百花齊放,若然之後個市見回吐,呢個板塊仍然係撈貨首選。

不過港股係咪就此天下太平,回復強勢,阿Man仍有所保留,始終美國仍會繼續針對中國,尤其侵侵為咗準備競逐連任,呢張中國牌不得不打,問題係幾時再出招,同埋出拳有幾大力。而香港夾正係中美之間,雙方拳腳交加之下,難免遭殃,政治市嘅嘢又邊有得估,只能好好控制注碼,跟住大勢走。暫時大市企穩喺23500點之上,呢啲情況當然未宜做淡,只不過上面23800條頸線唔係咁易收復,仲有23700至24200呢個裂口待補,港股暫時唔算得係轉勢,唔排除喺政治市影響下,又回復上落市局面,咁嘅環境,都係炒股唔炒市。

麥狄文
(徐狄怡‧證監會持牌人)