« 返回前頁列印

即巿股評 | 2020-05-06 13:15

【盤房來料】金山軟件拆金山雲上市撈番筆

放大圖片

美國多個州份及歐洲多國計劃放寬隔離措施,經濟活動有望重啟,華爾街暫時忘記侵侵揚言要追究中國疫情源頭,向其再徵關稅嘅事,隔晚美股早段顯著上升。不過始終疫情仍未完全消退,大家都會擔心一旦稍為鬆懈的話,隨時引發新一波疫情,最終美股升幅縮水,除納指外,其餘兩大指數升幅收窄至不足1%。

今早港股則接近平開,報23868點為半日低位,其後見A股低開高走扭轉跌勢,港股亦隨之向上,一度升208點,見24076點半日高位。不過去到10日線(24050點)及20 日線(24065點)滙聚區又掉頭,暫時未能企穩兩條平均線之上,於二萬四關爭持。中午恒指報收24026點,升157點;國指中午報收9759點,升61點。半日成交額回升至546點,多得北水回歸。

大市目前仍處於上落市格局,不過呢兩日恒指唔盡快收復10日及20日線,始終都係濕滯。幸而內地股市重開,未見有太大沽壓,順利收復開市失地,話晒本月下旬兩會召開,呢段時間點都會有資金維穩,再加上不時會傳出政策扶持不同行業,預期市場仍隨住呢啲消息,捉住個別板塊落鑊。

今日輪到重型設備股當炒,重汽(03808)升至超過一年高位,半日升7%。而阿Man心水反而係濰柴動力(02338),股價今日剛突破,順利升穿100日線,可望繼續向15.5至16元密集區推進。日前有大行唱好,指濰柴今年業績應有不俗表現。

中芯國際(00981)宣布計劃登陸內地科創板,擬新發行最多16.8562億股的人民幣計價股份(相當於現時已發行股份32.69%),不多於公司去年底已發行股份及新發行股份總和的25%。由於科創板一向可享有較高估值,喺港股上市嘅中芯自然水漲船高。睇番今日追入嘅買盤,唔少都係來自北水嘅買家,記得假期前中芯股價喺15元邊前停滯不前,都係因為北水沽貨,北水低賣高買,呢吓都真係服咗佢哋。暫時已有中芯喺手建議用16.5做個止賺位,16.5守就博股價再向18元挑戰,如果未有貨嘅,暫時高追冇乜着數,畢竟半日已升7%。

除咗中芯之外,不妨留意金山軟件(03888),半日升3.8%,公司旗下金山雲將登陸美國上市,雖然日後呢部份業務唔再當子公司入賬,但金山雲分拆上市,金山軟件點都會撈一筆。股價或可借呢個消息炒上28元樓上,挑戰2月高位。

麥狄文
(徐狄怡‧證監會持牌人)