« 返回前頁列印

即巿股評 | 2020-02-19 13:12

【盤房來料】資金充裕後市未能看淡

放大圖片

隔晚美股假後復市,表現較為反覆,雖灰蘋果公司發咗盈警,但跌勢當算溫和,納指總算企得住,道指跟標指則下跌。至於港股噚日急跌後,今日見反彈,半日低開高走,重返10日及250日線滙聚區。

恒指低開73點後,最多跌81點,見半日低位27448點,20 日線(27408點)有支持,大市止跌回升,最多升167點,見半日高位27697點。半日恒指報收27651點,升121點;國指則升107點,半日報收10912點。

除咗派咗一份遠遜預期成績表嘅大笨象(00005)表現較差,其他重磅藍籌股齊齊反彈。不過大笨象早段跌近3%,午市跌跌幅收窄至不足1%都算係咁。北水繼續力掃內銀股,中行(03988)、建行(00939)跟工行(01398)齊齊升逾1%。市場亦已消化蘋果公司盈警消息,一對手設股龍頭孖寶,舜宇(02382)跟瑞聲(02018)亦反彈逾1%

噚日跌勢較為顯著嘅內房股,今日亦見反彈,不過恒大(03333)率先七折賣樓,未知會否引發內地發展商打折賣樓成風,加上內房股之前因為人民幣走勢而升咗唔少,建議都係保守啲好。除咗打折賣樓影響收入,最怕係打咗折出售亦無人吼,由於內地多個城市進行封閉式管理,暫時經濟活動相當局限,預期今年首季內房股嘅銷售料受打擊,要避開一啲負債比率較重嘅公司,要揀內房股都係揀番龍頭穩陣。

中國為防經濟迅速下滑,自動自覺減免部份對美進口商品嘅反制關稅,受惠股份包括萬洲(00288)跟紙業股都見有資金追捧。而紙價提升亦見大行唱好紙業股,兩龍頭玖龍紙業(02689)跟理文造紙(02314)分別升7.7%及3.6%。
總上醫療股平安好醫生(01833)跟阿里健康(00241)都係阿Man之前推介嘅股份,今日齊創新高,半日分別升1.6%及2.4%,其他醫藥股普遍做好,話咗市場對醫藥及醫療服務有增無減,呢個板塊值得逢回吐吸納,中長線作然睇好。

雖然噚日港股有啲腳軟,而二萬八關暫未能突破,不過喺市場資金仍然充裕下,淡友似乎無計可施,睇嚟港股將會喺現水平整固儲力,只要能收復250日線,後市仍然睇高一線。

麥狄文
(徐狄怡‧證監會持牌人)